அமெரிக்காவைச் சேர்ந்த ஓய்வுபெற்ற மல்யுத்த வீரர்( American retired professional wrestler), ‘தி அண்டர்டேக்கர்’ என அழைக்கப்படும் மார்க் வில்லியம் கலோவே (Mark William Calaway) உயிரிழந்ததாகக் கூறும் புகைப்படப் பதிவு ஒன்று சமூக வலைத்தளங்களில் பகிரப்படுவதை FactSeeker இனால் அவதானிக்க முடிந்தது.

“60 வயதான அண்டர்டேக்கரின் குடும்பம் அவரது ரசிகர்களுக்கு ஒரு துக்க செய்தியை அறிவித்தது” எனும் விளக்கத்துடன், மருத்துவமனையில் இருப்பதை போன்ற புகைப்படத்துடனேயே இந்த பதிவு பகிரப்பட்டு வருகிறது.

இதற்கு பலர் தமது இரங்கல் கருத்துக்களை பதிவிட்டு வருவதால் FactSeeker இதன் உண்மை தன்மை குறித்து ஆராய்ந்தது.

இந்த பதிவில் பயன்படுத்தப்பட்ட புகைப்படத்தை Google Lens மூலம் ஆராய்ந்ததில், இதே போன்ற பதிவுகள் பல இதற்கு முன்பும் சமூக வலை தளங்களில் பகிரப்பட்டுள்ளன என்பது தெரியவந்தது.

மேலும், அண்டர்டேக்கர் உயிரிழந்ததாக நம்பகமான செய்திகள் எதுவும் எந்தவொரு ஊடகங்களிலும் வெளியாகவில்லை என்பதை உறுதிப்படுத்த முடிந்தது. அவரது உத்தியோகப்பூர்வ சமூக வலைதளப்பக்கங்களிலும் இதுபோன்ற தகவல்கள் எதுவும் வெளியிடப்படவில்லை.

அத்துடன், நேற்று (22) நடைபெற்ற Fanatics Fest நிகழ்வில் கலந்து கொண்டு ரசிகர்களை சந்தித்தபோது எடுக்கப்பட்ட காணொளியை அவர் தனது X பக்கத்தில் பதிவிட்டிருந்ததும் அவதானிக்க முடிந்தது.

https://x.com/undertaker/status/1936559314136703482

அதேபோன்று, SHAK Wrestling எனும் YouTube சேனலில் நேற்று வெளியிடப்பட்ட அண்டர்டேக்கரின் நேர்காணல் காணொளியும் காணக்கூடியதாக இருந்தது.

ஆகவே, அண்டர்டேக்கர் உயிரிழந்ததாக சமூக வலைதளங்களில் பகிரப்படும் பதிவுகள் உண்மைக்கு புறம்பானவை என்பதை FactSeeker உறுதிப்படுத்துகின்றது.