“වසර 31 ක සේවා කාලය අවසන් කරමින් අගෝස්තු 01 දා TNL නාලිකාව වසා දමයි” යනුවෙන් “ඉරි” නැමැති වෙබ් අඩවියක සහ Today News LK නැමැති වෙබ් අඩවියක පළ කළ පෝස්ටුවක් මෙසේ සමාජ මාධ්‍ය හරහා හුවමාරු වන බව Factseeker නිරීක්ෂණය කළේ ය.

මෙරට පළමු පුද්ගලික රූපවාහිනී නාලිකාව වූ ටී.එන්.එල් නාලිකාව වසා දමන බවට පළවන පුවත් සත්‍යද? යන්න පිළිබදව Factseeker නිරීක්ෂණයක යෙදුනෙමු.

මෙහිදී කරුණු සොයා යාමේදී  Factseeker ටී.එන්.එල් නාලිකාවේ සේවිකාවක් දුරකතනය ඔස්සේ සම්බන්ධ කර ගත් අතර ඇය ප්‍රකාශ කළේ, සිය නාලිකාව අගෝස්තු 01 දා සිට සුප්‍රීම් ටීවී නාලිකාව හා සමගාමීව විකාශය වන බවයි. එමෙන්ම ටී.එන්.එල් නාලිකාවේ සියලුම කාර්ය මණ්ඩලය ද ඔවුන් සමග ඉදිරියට ද කටයුතු කරන බව ඇය වැඩිදුරටත් ප්‍රකාශ කළා ය.

මෙහිදී Factseeker සුප්‍රීම් ග්ලෝබල් පුද්ගලික සමාගමේ සමූහ සන්නිවේදන අධ්‍යක්ෂ හා සුප්‍රීම් මාධ්‍ය ජාලයේ අධ්‍යක්ෂ කංචන කොඩිතුවක්කුගෙන් විමසීමක් කළෙමු. එහිදී ඔහු ප්‍රකාශ කළේ, ඉදිරි ජනාධිපතිවරණයේ උණුසුම සුපිරි ආකාරයෙන් ප්‍රේක්ෂකාගාරයට ගෙන යාම සදහා TNL නාලිකාවේ සංඛ්‍යාත සුප්‍රීම් ටීවී නාලිකාවට ලබා දුන් බවත් අගෝස්තු 01 දා සිට සුප්‍රීම් ටීවී සමග ඒකාබද්ධව කටයුතු කරන බවත් ය.

මේ සදහා  TNL ආයතනයේ කළමණාකාරීත්වය සමග සුප්‍රීම් ග්ලෝබල් පුද්ගලික සමාගම සමග ක්‍රමෝපායික ගිවිසුමකට එළැඹි බවත් ඉදිරියේදී TNL ආයතනය සතු ජනමාධ්‍ය ප්‍රවීනත්වයත් සුප්‍රීම් මාධ්‍ය ජාලය සතු නවීනතම තාක්ෂණයත් සමග වඩාත් පුළුල් ආවරණයක් ලබා දෙන බවත් කාංචන කොඩිතුවක්කු ප්‍රකාශ කළේ ය.

එමෙන්ම අගෝස්තු 01 දා සිට “සුප්‍රීම් TNL” රූපවාහිනී නාලිකාව ලෙස හදුන්වන බවත් මුල් කාලයේ සිටම ජනතා ආකර්ශනයට පාත්‍ර වූ කාලීන දේශපාලන වැඩසටහනක් වන “ජනහඩ” ඇතුළු කාලීන දේශපාලන වැඩසටහන් ඒ පරිදිම විකාශය වන බවත් කාංචන කොඩිතුවක්කු වැඩිදුරටත් ප්‍රකාශ කළේ ය.

මේ පිළිබද පැහැදිළි කරමින්  සුප්‍රීම් ග්ලෝබල් පුද්ගලික සමාගම මාධ්‍ය නිවේදනයක් ද නිකුත් කර ඇත.