මෙම වීඩියෝව බොහෝ පරිශීලකයන් විසින් දෙමළ භාෂාවෙන් සටහනක් ද සමග බෙදා ගෙන තිබෙන බව නිරීක්ෂණය විය.

“சிரிப்பவன் மனிதன், சிரிக்கவைப்பவன் மாமனிதன் – இன்று மன்னோடு Mr. Bean”
එහි සිංහල අර්ථය වන්නේ, “සිනහවන පුද්ගලයා මිනිසෙකි, වෙනත් අය සිනස්වන පුද්ගලයා ශ්‍රේෂ්ඨ මිනිසෙකි.” යන්න ය.

FactSeeker මෙම පළකිරීම්වල සත්‍ය අසත්‍යතාව විමර්ශනය කිරීමේදී රෝවන් ඇට්කින්සන්ගේ මරණය සනාථ කරන කිසිදු ආකාරයක නිල ප්‍රවෘත්තියක් විදෙස් මාධ්‍ය අන්තර්ගතයන් තුළ නොතිබිණි.

මීට අමතරව, ඔහුගේ නිල සමාජ මාධ්‍ය වේදිකාවන්වල ද එවැනි සිද්ධියක් පිළිබඳ කිසිඳු සඳහනක් නොතිබිණි.

සංසරණය වන වීඩියෝවේ ඡායාරූප කිහිපයක් Google Reverse Image හරහා පරීක්ෂා කිරීමේදී හෙළි වූයේ එය රෝවන් ඇට්කින්සන්ගේ අවමංගල්‍යයට සම්බන්ධ නොවන බවයි. එම වීඩියෝවට අදාළ සත්‍ය සිදුවීම, 2017 මාර්තු මාසයේදී වෙස්ට්මිනිස්ටර් ත්‍රස්ත ප්‍රහාරයේදී ඝාතනය කරන ලද පොලිස් නිලධාරි කීත් පාමර්ගේ අවමංගල්‍යයට අදාළ වීඩියෝ දර්ශන බව අනාවරණය විය.

මීට අමතරව මෙම පළකිරීම් ව්‍යාජ බව තහවුරු කර ගැනීම සඳහා රෝවන් ඇට්කින්සන්ගේ මෑතකාලීන නිර්මාණ දායකත්වයන් කිහිපයක් පිළිබඳ තොරතුරු FactSeeker ට සොයා ගත හැකි විය.

Mr. Bean: The Animated Series Season 4 – පසුගිය මැයි 01 දා එක්සත් රාජධානියේ සහ මැයි 5 වන දින අප්‍රිකාවේ දී පවත්වා තිබිණි. රෝවන් ඇට්කින්සන් එහි විධායක නිෂ්පාදකයා ලෙස කටයුතු කර ඇත.

Man vs Baby නමින් නෙට්ෆ්ලික්ස් හි කොටස් හතරක ප්‍රහසන කතා මාලාවක් ද මේ වන විට නිෂ්පාදන කරමින් පවතින බව විදෙස් මාධ්‍ය වාර්තාතාකර ඇත.
Jhonny English 4 – Jhonny English Franchise නම් සිව්වන චිත්‍රපටය මේ වසරේ එළිදැක්වීමට නියමිත බව විදෙස් මාධ්‍යවල වාර්තා වෙයි.

මේ අනුව, Mr.Bean වශයෙන් සුප්‍රසිද්ධ ප්‍රහසන රංගන ශිල්පී රෝවන් ඇට්කින්සන් අභාවප්‍රාප්ත වී ඇති බවට පළ වන සමාජ මාධ්‍ය සටහන් සහ හුවමාරු වන වීඩියෝව නොමගයවනසුළු වීඩියෝවක් බවත් ඔහු දැනට විවිධ විනෝදාස්වාද ප්‍රසංගවල නිරතවෙමින් සිටින බවත් Factseeker තහවුරු කරයි.