මෙරට අපනයන ඇගළුම් කර්මාන්තයේ අද්විතීය නමක් දිනා ඇති MAS හෝල්ඩින්ග් සමූහයට අයත් මිහින්තලේ පිහිටි කර්මාන්ත ශාලා දෙකක් වසා දැමීමෙන් දහස් ගණනකගේ රැකියා අහිමි වී තිබෙන බව srilanakamirror.com වෙබ් අඩවිය පසුගියදා ප්‍රවෘත්තියක් පළ කර තිබිණි.

මේ සම්බන්ධයෙන් “ඇගළුම් දැවැන්තයෙක් වූ MAS හෝල්ඩින්ග් කර්මාන්ත ශාලා දෙකක් වසයි.” යනුවෙන් පෝස්ටුවක් සමාජ මාධ්‍ය ඔස්සේ ද සංසරණය වී තිබිණි.

මෙහි සත්‍ය අසත්‍යතාව පිළිබද සොයා බැලීමට Factseeker ට අවශ්‍ය විය. ඒ අනුව අපි MAS හෝල්ඩින්ග් සමුහයේ සන්නිවේදන අංශයේ ප්‍රධානියෙකු සම්බන්ධ කර ගත්තතෙමු.

එහිදී ඔහු සදහන් කළේ, MAS හෝල්ඩින්ග් සමූහයේ කර්මාන්ත ශාලා දෙකක් මිහින්තලේ නොමැති අතර එහි ඇත්තේ එක් කර්මාන්ත ශාලාවක් පමණක් බව ය. කර්මාන්ත ශාලා දෙකක් වසා දමා ඇති බවට පළවන පුවත් සම්පූර්ණයෙන් අසත්‍ය බව හෙතෙම සදහන් කළේ ය.

එමෙන්ම මෙම ප්‍රවෘත්තියේ සදහන් වන පරිදි මිහින්තලේ කර්මාන්ත ශාලාව වසා දමා සේවකයින් ඉවත් කර නොමැති අතර එය වසා ඇත්තේ තාවකාලිකව පමණක් බව ත් ඔවුන්ට නියමිත පරිදි වැටුප් ගෙවන බවත් ඔහු සදහන් කළේ ය.

මිහින්තලේ කර්මාන්ත ශාලාව ඉකුත් අගෝස්තු 25 වෙනිදා සිට තාවකාලිකව වැසීමට හේතු වූයේ ඇගළුම් ක්ෂේත්‍රයේ ගෝලීයව උද්ගතව පවතින  ඇනවුම් අඩු වීමේ ප්‍රවනතාව මත බව හෙතෙම වැඩිදුරටත් සදහන් කළේ ය.

එමෙන්ම MAS හෝල්ඩින්ග් සමූහයට අයත් කර්මාන්ත ශාලා 40 කට අධික සංඛ්‍යාවක් පවතින අතර එහි සේවකයෝ 80 000 කට අධික සංඛ්‍යාවක් සේවය කරති.

ඒ අනුව MAS හෝල්ඩින්ග් මිහින්තලේ කර්මාන්ත ශාලා දෙකක් වසා දමා එහි සේවකයින් දහසකට පමණ රැකියා අහිමිවන බවට පළවන වාර්තා නොමග යවන ප්‍රවෘත්තීන් බව Factseeker තහවුරු කරයි.