හොදට හිටියොත් පාර්ලිමේන්තු මන්ත්‍රීවරුන්ගේ වැටුප් වැඩිකරන බව ජනාධිපති කිව්වා ද?
“හොදට හිටියොත් පාර්ලිමේන්තු මන්ත්‍රීවරුන්ගේ වැටුප් වැඩිකරනවා” යනුවෙන් සඳහන් කරමින් ජනාධිපති රනිල් වික්‍රමසිංහගේ ඡායාරූපයද ඇතුළත් කළ පෝස්ටුවක් සමාජ මාධ්‍ය තුළ හුමවාරුවෙමින් පවතී.
by Anonymous |
ජනවාරි 11, 2024
පාර්ලිමේන්තු මන්ත්‍රීවරුන් තමාට සහය පළකරන්නේ නම්, ඔවුන්ගේ වැටුප් වැඩිකරන බවට ජනාධිපතිවරයා පැවසු බව සඳහන් කරමින් එම පෝස්ටුව සමාජ ජාල හරහා හුවමාරු වන අතර බොහෝ දෙනා ඒ සඳහා තමන්ගේ අකමැත්ත සහ විරෝධය දක්වමින් ප්‍රතිචාර දක්වා ඇති බව දක්නට ලැබේ.
a5news වෙබ් අඩවියේ මෙය පළකළ බව සඳහන් කරමින් පෝස්ටුව සකස් කර ඇති බැවින් a5news වෙඩ් පිටුවේ සහ නිල ෆේස්බුක් පිටුවේ මෙය පළකර ඇත්දැයි Fact seeker සොයා බැලු අතර එවැන්නක් සොයා ගැනීමට නොහැකිවිය.
මේ හේතුවෙන් ජනාධිපතිවරයා මෙවැනි ප්‍රකාශයක් කර ඇත්දැයි සොයා බැලුඅතර ජනාධිපතිවරයාගේ සිදුකළ ප්‍රකාශ සහ නිල සමාජ මාධ්‍ය ගිණුම්වල එවැනි ප්‍රකාශයක් සහිත පුවතක් පළ කර ඇති බවක් සොයා ගත නොහැකි විය.
මේ සම්බන්ධයෙන් Fact seeker ජනාධිපති මාධ්‍ය අංශයෙන් සිදුකළ විමසීමේදි සඳහන් කළේ මෙවැනි ප්‍රකාශයක් ජනාධිපතිවරයා සිදුකර නොමැති බවත් මෙය අසත්‍ය ප්‍රකාශයක් බවත්ය.
ඒ අනුව “හොදට හිටියොත් පාර්ලිමේන්තු මන්ත්‍රීවරුන්ගේ වැටුප් වැඩිකරනවා” යනුවෙන් මෙම පෝස්ටුව සංස්කරණය කර ඇති අසත්‍ය පෝස්ටුවක් බව Fact seeker තහවුරු කරයි.
