හිටපු ජනපති මෛත්‍රී පාස්කු ඉරිදා ප්‍රහාරය පොත අතැතිව සිටින ඡායාරූපයක් ද?
ජ්‍යෙෂ්ඨ මාධ්‍යවේදී සුනන්ද දේශප්‍රිය විසින් රචිත'පාස්කු ඉරිදා ප්‍රහාරය' කෘතිය හිටපු ජනාධිපති මෛත්‍රීපාල සිරිසේන අතැතිව ලබාගත් ඡායාරූපයක් විවිධ අර්ථකථන සහිත ව සමාජ මාධ්‍ය ඔස්සේ සංසරණය වන ආකාරය FactSeeker නිරීක්ෂණය කළේය.
by Anonymous |
ඔක්තෝබර් 7, 2024
එහිදී ඇතැමෙකු ප්‍රශ්න කර තිබුණේ , එය සංස්කරණය කළ ඡායාරූපයක් ද යන්නයි.
එබැවින් එහි සත්‍යතාව FactSeeker පරීක්ෂා කළේ ය.
සුනන්ද දේශප්‍රිය විසින් රචිත ‘පාස්කු ඉරිදා ප්‍රහාරය’ කෘතිය සයුර ප්‍රකාශනයකි.
එම නිසා සුනන්ද දේශප්‍රිය හෝ සයුර ප්‍රකාශකයින් විසින් මෙම ඡායාරූපය තම සමාජ මාධ්‍ය ගිණුමක පළ කර තිබේද? යන්න පිළිබඳව අපි සොයා බැලුවෙමු.
එහිදී සයුර ප්‍රකාශකයින්ගේ නිල ෆේස්බුක් පිටුව මගින් එම ඡායාරූපය පළ කර තිබෙන බව අපට නිරීක්ෂණය විය.
සුනන්ද දේශප්‍රිය විසින් ද සිය X ගිණුමේ එම ඡායාරූපය උපුටා පළ කර තිබිණි.
අප මෙම ඡායාරූපය පිළිබඳව සයුර ප්‍රකාශන අධිපති නිලන්ත ගමගේගෙන් විමසීමක් කළෙමු.
එහිදී ඔහු ප්‍රකාශ කළේ, හිටපු ජනාධිපති මෛත්‍රීපාල සිරිසේන කොළඹ ජාත්‍යන්තර පොත් ප්‍රදර්ශනයේ සයුර ප්‍රදර්ශන කුටියට පැමිණ අදාළ කෘතිය මිලදී ගත් බවත්, එහිදී බොහෝ දෙනෙකු ඔහුගේ ඡායාරූප ලබාගත් බවත්ය.
මෙසේ හුවමාරු වන්නේ එලෙස ලබාගත් ඡායාරූපයක් බව ඔහු සඳහන් කළේය.
FactSeeker මේ පිළිබඳව හිටපු ජනාධිපති මෛත්‍රීපාල සිරිසේනගේ කාර්යාලයෙන් ද විමසීමක් කළේය.
එහිදී එම කාර්යාලයේ ප්‍රකාශකයෙකු සඳහන් කළේ, පාඨකයෙකුගේ ඉල්ලීමක් මත හිටපු ජනාධිපතිවරයා ‘පාස්කු ඉරිදා ප්‍රහාරය’ කෘතිය සමග මෙම ඡායාරූපයට පෙනී සිටි බවයි.
එය සත්‍ය ඡායාරූපයක් බව ඔහු තහවුරු කළේය.
හිටපු ජනාධිපතිවරයා කොළඹ ජාත්‍යන්තර පොත් ප්‍රදර්ශනයේ සයුර පොත් කුටියට පැමිණ ‘පාස්කු ඉරිදා ප්‍රහාරය’ කෘතිය මිලදී ගන්නා ආකාරය දැක්වෙන තවත් ඡායාරූප කිහිපයක් අපට හමුවිය.
ඒ අනුව හිටපු ජනාධිපති මෛත්‍රීපාල සිරිසේන කොළඹ ජාත්‍යන්තර පොත් ප්‍රදර්ශනයේදී ‘පාස්කු ඉරිදා ප්‍රහාරය’ කෘතිය අතැතිව ලබාගත් ඡායාරූපය සත්‍ය ඡායාරූපයක් බව FactSeeker තහවුරු කරයි.
