ඒ අනුව එම වීඩියෝවල සත්‍යාසත්‍යතාව පිළිබඳව FactSeeker විමර්ශනය කළේය.

එහි එක් වීඩියෝවක ඇතුළත් වන්නේ චතුරස්‍ර ආකාරයේ ගර්භයක් තුළ තැන්පත් කරනු ලැබූ කෞතුක වස්තුවකි. මෙම වීඩියෝව සමීපව නිරීක්ෂණය කිරීමේදී එහි “Replica Tooth Relics of Shakyamuni Buddha” යනුවෙන් සඳහන්ව තිබුණි. එහි සරල තේරුම “ශාක්‍යමුණි බුදුන්ගේ අනුරුව දන්ත ධාතු” යන්නයි. ඒ ඔස්සේ අප සිදු කළ විමර්ශනයේදී එවැනි අනුරූ දන්ත ධාතුන් වහන්සේලා ලොව පුරා ඇති බව නිරීක්ෂණය විය.

එම වීඩියෝව Google Lens හරහා  විමර්ශනය කර බැලීමේදී Waki Relic Museum නමැති ෆේස්බුක් ගිණුමක් ඔස්සේ 2024. 04. 30 වන දින උඩුගත කළ වීඩියෝවක අප පරීක්ෂා කළ වීඩියෝවේ ඇතුළත් දර්ශනවලට සමාන දර්ශන ඇතුළත් විය. මෙය මැලේසියාවේ ක්වාලාලම්පූර්හි පිහිටි කෞතුකාගාරයක පැවැත්වූ දළදා අනුරූ ප්‍රදර්ශනයක් බව එහි ෆේස්බුක් පිටුවට අදාළ වෙබ් පිටුව පරික්ෂා කිරීමේදී සොයා ගැනීමට හැකිවිය.

මෙරට දළදා මැදුරේ තැන්පත් කර ඇති දන්ත ධාතූන් වහන්සේ රදනක දත් වර්ගයට අයත් එකකි. ඒ අනුව මෙම වීඩියෝව මේ දිනවල “සිරි දළදා වන්දනාවේ” ප්‍රදර්ශනය කරන දළදාවට අදාළ වීඩියෝවක් නොවන බව පෙනෙන්නට තිබුණි.

සමාජ මාධ්‍යයෙහි සංසරණය වූ අනෙක් වීඩියෝවේ ඇතුළත් වූයේ රන් පැහැයෙන් යුත් කම්බියකින් ආවරණය කරන ලද නෙළුම් මලක ආකෘතියකට සකසන ලද බඳුනක තැන්පත් කර ඇති කෞතුක වස්තුවකි.

එම වීඩියෝව විමර්ශනය කිරීමේදී දළදා  ප්‍රදර්ශනය ආරම්භ වීමට ප්‍රථමයෙන් එම වීඩියෝව සමාජ මාධ්‍ය හරහා සංසරණය වී තිබූ ආකාරය Factseeker හට අනාවරණය විය.

එම වීඩියෝවේ සිරස්තලයෙහි එය දළදා අනුරූ ප්‍රදර්ශන අවස්ථාවක් බව දක්වා තිබිණි.

මෙම වීඩියෝ දර්ශන සම්බන්ධයෙන් අප මහනුවර ශ්‍රී දළදා මාළිගාවෙන් කළ විමසීමේදී එහි මාධ්‍ය ඒකකයේ ප්‍රධානී සුභාෂ ලියනගේ පවසා සිටියේ එම කිසිදු වීඩියෝවක මහනුවර ශ්‍රී දළදා මාළිගාවේ තැන්පත් දළදා වහන්සේ නොමැති බවයි. එමෙන්ම “සිරි දළදා වන්දනාව” ප්‍රදර්ශනයේදී දළදා වහන්සේ ඡායාරූපගත කිරීමට කිසිදු අවසරයක් නොමැති බව ඔහු වැඩිදුරටත් පැවසීය.

මෙම කරුණු අනුව මහනුවර ශ්‍රී දන්ත ධාතූන් වහන්සේ බව කියා පාමින් සමාජ මාධ්‍ය හරහා සංසරණය වන වීඩියෝ මහනුවර ශ්‍රී දළදා මාළිගාවේ තැන්පත් දළදා වහන්සේගේ වීඩියෝ නොවන බව Factseeker තහවුරු කරයි.