සමාජ මාධ්‍ය ජාලවල හුවමාරු වෙන්නේ ව්‍යාජ ලිපියක් – චීනය
ශ්‍රී ලංකාවට ලබා දී තිබෙන ණය ආපසු ගෙවීම පිණිස වසර දෙකක සහන කාලයක් ලබාදීමට සූදානම් බව චීන රජය විසින් ජනාධිපති රනිල් වික්‍රමසිංහ වෙත දැනුම් දෙනු ලැබ ඇතැයි සන්ඩේ ටයිම්ස් පුවත්පත පසුගිය ඉරිදා වාර්තා කළේය.
by Anonymous |
නොවැම්බර් 14, 2023
ශ්‍රී ලංකාවට ලබා දී තිබෙන ණය ආපසු ගෙවීම පිණිස වසර දෙකක සහන කාලයක් ලබාදීමට සූදානම් බව චීන රජය විසින් ජනාධිපති රනිල් වික්‍රමසිංහ වෙත දැනුම් දෙනු ලැබ ඇතැයි සන්ඩේ ටයිම්ස් පුවත්පත පසුගිය ඉරිදා වාර්තා කළේය.
ණය ආපසු ගෙවීම සම්බන්ධයෙන් සහන ලබාදෙන මෙන් ශ්‍රී ලංකාව කලක් මුළුල්ලේ චීනය ඇතුළු ජාත්‍යන්තර ආධාරකරුවන්ගෙන් ඉල්ලා සිටින අතර, ඒ සම්බන්ධයෙන් චීනය නිල වශයෙන් සිය ස්ථාවරය ප්‍රකාශ කළ පළමු වතාව මෙයයි.
මේ අතර චීනය ජනාධිපති වික්‍රමසිංහ වෙත යොමුකරන ලද ලිපියේ පිටපතක් බව පැවසෙන ඡායාරූපයක් සමාජ මාධ්‍ය ජාල ඔස්සේ හුවමාරු විය.
කෙසේ වුවත්, ට්විටර් ඔස්සේ අදහස් දක්වමින් ඒ පිළිබඳව ප්‍රතිචාරය පළකරන කොළඹ පිහිටි චීන තානාපති කාර්යාලය පවසන්නේ, සිය තානාපති කාර්යාලයේ ලිපි ශීර්ෂය ද සහිතව එසේ සමාජ මාධ්‍ය ඔස්සේ හුවමාරුවෙමින් පවතින්නේ ව්‍යාජ ලිපියක් බවය.
පුවතක් සම්බන්ධයෙන් නිල තොරතුරු මූලාශ්‍ර කෙරෙහි යොමුවන මෙන් ද චීන තානාපති කාර්යාලය ඉල්ලීමක් කර තිබුණි.
කෙසේ වුවත්, සන්ඩේ ටයිම්ස් පුවත්පතේ සඳහන් වාර්තාව හෝ සමස්තයක් ලෙස ණය සම්බන්ධයෙන් සහන ලබාදෙන මෙන් ශ්‍රී ලංකාව කරන ඉල්ලීම පිළිබඳව චීනය මෙතෙක් ප්‍රතිචාරයක් පළකොට නැත.
ශ්‍රී ලංකාවේ ණය බර සම්පූර්ණයෙන්ම කපාහරින මෙන් ජාත්‍යන්තර විද්වතුන් 182 දෙනෙකු මෑතදී විවෘත ඉල්ලීමක් කර තිබුණ නමුත් එය ප්‍රායෝගික ක්‍රියාදාමයක් නොවන බව තවත් සමහර ආර්ථික විද්‍යාඥයින්ගේ මතය වී තිබේ.
