එහිදී මන්ත්‍රීවරයා ප්‍රකාශ කළේ, පළාත් පාලන මැතිවරණය ප්‍රකාශයට පත් කිරීමෙන් පසු සමූපකාර සමිතිවල නිලවරණය නොපවත්වන ලෙස මැතිවරණ කොමිසම දැනුම් දී තිබියදී පසුගිය 16 වෙනි දින වීරකැටිය සමූපකාර සමිතියේ නිලවරණය පැවැත් වූ බවයි.

එම ප්‍රකාශය මෙතැනින් – https://youtu.be/AJEZBAAKvWk?t=24966

ඒ සඳහා පිළිතුරු දුන් ජාතික ජන බලවේගයේ හම්බන්තොට දිස්ත්‍රික් පාර්ලිමේන්තු මන්ත්‍රී අරවින්ද සෙනරත් ප්‍රකාශ කළේ, වීරකැටිය සමූපකාර සමිතියේ නිලවරණය පැවැත්වූයේ 2024 දෙසැම්බර් 29 වෙනි දින බවත් මාර්තු 16 දා පැවැත්වූවේ එහි මහා සභා රැස්වීම බවත් ය.

එම ප්‍රකාශය මෙතැනින් – https://youtu.be/AJEZBAAKvWk?t=26145

මේ අනුව මන්ත්‍රීවරුන් දෙදෙනාගේ අදහස් පරස්පර වීම නිසා Factseeker ඒ සම්බන්ධයෙන් සොයා බැලීය.

අපි මේ සම්බන්ධයෙන් හම්බන්තොට සමූපකාර කොමසාරිස් කාර්යාලයෙන්  කළ විමසීමකදී එහි ජ්‍යෙෂ්ඨ නිලධාරියෙක් සඳහන් කළේ, වීරකැටිය සමූපකාර සමිතියේ නිලවරණය ඉකුත් දෙසැම්බර් 29 දා පැවැති අතර මාර්තු 16 වෙනිදා පැවැත්වූයේ එහි මහ සභා රැස්වීම බවයි.

1977 දෙසැම්බර් 28 වෙනි දින නිකුත් කරන ලද 297/7 දරණ අතිවිශේෂ ගැසට් පත්‍රයට අනුව සමූපකාර සමිති නිලවරණය පැවැත්වෙයි. මෙම නිලවරණය සඳහා නාමයෝජනා භාර ගැනීම, නිලවරණය පැවැත්වීම සහ මහා සභාව රැස්වීම දින තුනකදී සිදු වෙයි.එහිදී සමූපකාර  සාමාජිකයින් 100 දෙනෙකුගේ සාමාජිකත්වයෙන් මහා සභාව පිහිටුවනු ලබයි.

නිලවරණයේදී පිහිටුවා ගනු ලබන මහා සභාවේ සමාජිකයින් 100 දෙනා අතුරෙන් හත් දෙනෙකුගෙන් සමන්විත අධ්‍යක්ෂ මණ්ඩලයක් පත් කරයි. යම් අවස්ථාවකදී අධ්‍යක්ෂ මණ්ඩලය සඳහා හත් දෙනෙකුට වැඩි සංඛ්‍යාවකගේ නම් යෝජනා වී තිබුණහොත් මහා සභා රැස්වීමේදී ඡන්ද විමසීමක් පවත්වා හත් දෙනෙකුගෙන් සමන්විත අධ්‍යක්ෂ මණ්ඩලය පත් කරයි.

මේ අතර තුර පළාත් පාලන මැතිවරණය පැවැත්වීම ප්‍රකාශයට පත් කෙරිණි. එම නිසා සියලුම වීවිධ සේවා සමූපකාර සමිතිවල නිලවරණ අවලංගු කරන ලෙස මැතිවරණ කොමිසම පළාත් සමූපකාර කොමසාරිස්වරුන්ට ලිඛිතව දන්වා තිබිණි.

එහිදී නිලවරණ පවත්වා අවසන් කර ඇති සමූපකාර සමිතිවල මහා සභාව පැවැත්වීම සඳහා අවසර දෙන ලෙස දකුණු පළාත් සමූපකාර සංවර්ධන කොමසාරිස්වරයා විසින් 2025 මාර්තු 10 වෙනි දින ලිපියක් මගින් හම්බන්තොට දිස්ත්‍රික් සහකාර මැතිවරණ කොමසාරිස්වරයාගෙන් ඉල්ලීමක් කර තිබේ.

ඒ අනුව නිලවරණ පවත්වා අවසන් කර ඇති විවිධ සේවා සමූකාර සමිතිවල මහා සභා රැස්වීම පැවැත්වීම සඳහා හම්බන්තොට දිස්ත්‍රික් සහකාර මැතිවරණ කොමසාරිස්වරයා අවසර දී ඇත. ඒ සඳහා වන ලිපිය හම්බන්තොට දිසිත්‍රික් මැතිවරණය කාර්යාලය මගින් 2025.03.14 වෙනි දින පළාත් සමූපකාර සංවර්ධන කොමසාරිස්වරුන්ට යවා ඇත.

ඒ අනුව ඉකුත් 16 දින පවත්වා ඇත්තේ වීරකැටිය විවිධ සේවා සමූපකාර සමිතියේ මහා සභා රැස්වීම වන අතර නිලවරණය පැවත්වූ බවට දිලිප් වෙදආරච්චි මන්ත්‍රීවරයා පාර්ලිමේන්තුවේදී කළ ප්‍රකාශය සාවද්‍ය බව Factseeker තහවුරු කරයි.