විපක්ෂ නායක පුටුවේ වාඩිවුයේ මාලිමා මන්ත්‍රීවරයෙක්ද?
දසවැනි පාර්ලිමේන්තුවේ සමාරම්භක දිනය වූ අද (21) පැවැත්වුණු සභා වාරයේදී නවක මන්ත්‍රීවරයෙක් විපක්ෂ නායකවරයාට වෙන් කර ඇති ආසනයේ අසුන් ගැනීමෙන් පාර්ලිමේන්තු කාර්ය මණ්ඩලයේ සේවකයෙකු හා මන්ත්‍රීවරයා අතර වූ සංවාදයක් සමාජ මාධ්‍ය හරහා වේගයෙන් හුවමාරු වෙමින් පවතී.
by Anonymous |
නොවැම්බර් 21, 2024
https://www.facebook.com/share/v/1GJ59aCbGF/
මේ අතර හිරු ප්‍රවෘත්ති වෙබ් අඩවිය, මෙම මන්ත්‍රීවරයා ජාතික ජන බලවේගය (මාලිමාව) නියෝජනය කරමින් පාර්ලිමේන්තු පැමිණි මන්ත්‍රීවරයෙකු බවට සඳහන් කරමින් වාර්තා පළ කර තිබුණි.
මේ සම්බන්ධයෙන් factSeeker පාර්ලිමේන්තුවේ සන්නිවේදන අංශයෙන් කළ විමසීමකදී අනාවරණය වුයේ, මෙම මන්ත්‍රීවරයා යාපනය දිස්ත්‍රික්යෙන් ස්වාධීන කණ්ඩායම 17 යටතේ තරඟ කර පත්වු මන්ත්‍රීවරයා වූ අර්චුනා රාමනාදන් බවය.
හිරු පුවත් වෙබ් අවවිය මෙය “විපක්ෂ නායක පුටුවේ වාඩිවුණු මාලිමා මන්ත්‍රීතුමා” යනුවෙන් සඳහන් කරමින් පළකර තිබු අතර පසුව එය “විපක්ෂ නායක පුටුවේ වාඩිවුණු මන්ත්‍රීතුමා” ලෙසද සංස්කරණය කර තිබිණි. “විපක්ෂ නායක පුටුවේ වාඩිවුණු නවක මන්ත්‍රීතුමා” සහ “විපක්ෂ නායක පුටුවේ වාඩිවුණු යාපනයේ ස්වාධීන මන්ත්‍රී වෛද්‍ය අර්චුනා රාමනාදන්” යනුවෙනුත් අවස්ථා හතරකදී මෙම ප්‍රවෘත්තිය සංස්කරණය කර තිබෙන බව factSeeker නිරීක්ෂණය කළේ ය.
මෙම නවක මන්ත්‍රී අර්චුනා රාමනාදන් සහ පාර්ලිමේන්තු කාර්ය මණ්ඩලයේ සේවකයා අතර සංවාදයේදී ඔහු සදහන් කරන්නේ පාර්ලිමේන්තුවේ සමාරම්භක දිනයේදී ආසන වෙන් කිරීමක් සිදු නොකරන බවත් ඕනෑම තැනක අසුන් ගත හැකි බවත්ය.
මේ සම්බන්ධයෙන් ද factSeeker පාර්ලිමේන්තුවේ සන්නිවේදන අංශයෙන් විමසු අතර සම්ප්‍රදායිකව ජනාධිපතිවරයා , අගමැතිවරයා සහ විපක්ෂනායකවරයා සඳහා වෙන් කර ඇති ආසන හැර අනිකුත් අසුන් වෙන් කිරීමක් නොකරන බවත් පළමු දිනයේදි එම ඕනෑම ආසනයක අසුන් ගත හැකි බව ද සඳහන් කළේ ය.
ඒ අනුව විපක්ෂ නායකවරයාගේ ආසනයේ අසුන් ගත්තේ මාලිමාවේ මන්ත්‍රීවරයෙකු නොව යාපනය දිස්ත්‍රික්කයෙන් ස්වාධීන කණ්ඩායම 17 යටතේ තරඟ කර තේරී පත් වූ අර්චුනා රාමනාදන් මන්ත්‍රීවරයා බව factSeeker තහවුරු කරයි.
