“සූර වීර කෙල්ලෝ” ෆේස්බුක් පිටුව පවත්වාගෙන යන වරංගනා කැකුළාවල ලොතරැයි දිනුමක් ලබා ඇති බව පෙන්වන ඡායාරූපයක් පසුගිය දිනවල සමාජ මාධ්‍ය ඔස්සේ හුවමාරු විය. ඇතැම් පෝස්ටුවල අදහස් තීරයේ එහි සත්‍යතාව ප්‍රශ්න කර තිබූ බැවින් එහි කරුණු පරීක්ෂා කිරීමට FactSeeker කටයුතු කළේය.

වරංගනා කැකුළාවල විසින් එවැනි ඡායාරූපයක් සිය පුද්ගලික ෆේස්බුක් පිටුව වෙත මුදාහැර තිබේද? යන්න අප විසින් පරීක්ෂා කරන ලද අතර එහිදී පහත පෝස්ටුව අපට හමුවිය.

ජාතික රූපවාහිනියේ විකාශය කරන ලොතරැයි ප්‍රතිඵල විකාශය පසුබිමෙන් පෙනෙන සේ ඇය සිය ජයග්‍රාහී ලොතරැයිපත අතැතිව එම ඡායාරූපයට පෙනී සිටී. මෙම ප්‍රතිඵල විකාශය පරීක්ෂා කිරීමේදී ඇගේ පසුබිමෙන් ඇති තිරයේ දැක්වෙන ජයග්‍රාහී අංක නිවැරදි බව තහවුරු විය. තවද ලොතරැයි ප්‍රතිඵල විකාශයේ සම්ප්‍රවේශක වන සමන් බණ්ඩාර විසින් ද එම පෝස්ටුවේ අදහස් තීරයේ ඇයට සුබ පැතුම් එක් කර තිබෙනු දක්නට ලැබුණි.

එම ඡායාරූපයට අමතරව ලොතරැයි අලෙවි නියෝජිත මහතා සමග පෙනීසිටින වීඩියෝ පටයක්ද ඇය තම පුද්ගලික ෆේස්බුක් පිටුවට එක් කර තිබුණි. එම වීඩියෝව අවසානයේදී සංවර්ධන ලොතරැයි මණ්ඩලයේ නිවේදනයක් ප්‍රදර්ශනය කරයි. එහි සඳහන් අන්දමට ඇය ජයග්‍රහණය කර ඇත්තේ සුපිරි ත්‍යාගය නොව රුපියල් ලක්ෂ 20 ත්‍යාගයකි. එහි ඇතුළත් අලෙවි නියෝජිතයාගේ නම ප්‍රතිඵල විකාශයේදී ප්‍රදර්ශනය කරන නම බව දර්ශන ඔස්සේ තහවුරු විය.

සංවර්ධන ලොතරැයි මණ්ඩලයේ දිනුම් ඇදීමේ රටාව අනුව අංක 4ක් ගැළපීමෙන් හිමි ත්‍යාග මුදල රුපියල් මිලියන 2ක් හෙවත් ලක්ෂ 20ක් බව අපගේ පරීක්ෂාවේදී තහවුරු විය. එහිදී ජයග්‍රාහී අංක අනුපිළිවෙළින් යෙදීම මෙම ලොතරැයිය සඳහා අවශ්‍යතාවක් නොවේ.

සංවර්ධන ලොතරැයි මණ්ඩලයේ නිල ෆේස්බුක් පිටුව පරීක්ෂා කිරීමේදී වරංගනා කැකුළාවල විසින් සිය ෆේස්බුක් පිටුවේ පළ කළ පෝස්ටු බෙදා ගනිමින් සංවර්ධන ලොතරැයි මණ්ඩලය (DLB) විසින් ඇයට සුබ පැතුම් එක් කර ඇති ආකාරය FactSeeker නිරීක්ෂණය කළේය.

මේ අනුව, වරංගනා කැකුළාවල ලොතරැයි දිනුමක් ලබා ඇති බව පෙන්වන ඡායාරූපය සත්‍ය බවත්, ඇය එම දිනුම් ඇදීමේ රුපියල් ලක්ෂ 20ක ජයග්‍රාහකයෙකු බවත් FactSeeker තහවුරු කරයි.