ඒ අතර, ‘වත්කම් ප්‍රකාශ ඉදිරිපත් කර ඇත්තේ පාර්ලිමේන්තු මන්ත්‍රීවරුන් 16 දෙනෙකු පමණක් බවත්, ජනතා විමුක්ති පෙරමුණ නියෝජනය කරන කිසිදු පාර්ලිමේන්තු මන්ත්‍රීවරයෙකු ඒ අතර නොවන බවත්’ දැක්වෙන සමාජ මාධ්‍ය සටහන් කෙරෙහි Factseeker අවධානය යොමු විය.

අදාළ සමාජ මාධ්‍ය පෝස්ටු පහත පරිදි විය.

ඒවායේ සඳහන් වන්නේ, “වත්කම් ප්‍රකාශ කරල තියෙන්නේ මුළු පාර්ලිමේන්තුවෙන්ම 16 දෙනයි. ජේවීපියේ එකම එක මන්ත්‍රී කෙනෙක්වත් නෑ..!“ යනුවෙනි.

මෙම ඇතැම් සමාජ මාධ්‍ය පෝස්ටු සමග ට්‍රාන්ස්පේරන්සි ඉන්ටර්නැෂනල් ආයතනයේ නිල වෙබ් අඩවියට අයත් මෙම www.tisrilanka.org/mpassets/ සබැඳිය අමුණා ඇති අයුරු අපට නිරීක්ෂණය කළ හැකි විය. ඒ වෙත පිවිසීමේදී අනාවරණය වූයේ, හිටපු සහ වත්මන් පාර්ලිමේන්තු මන්ත්‍රීවරුන් 17 දෙනෙකුගේ වත්කම් සහ බැරකම් ප්‍රකාශ පමණක් එහි ප්‍රදර්ශනය කර ඇති බවයි. තවද එහි දැක්වෙන වත්කම් ප්‍රකාශ අතර “2023/2024 වර්ෂයේ“ වත්කම් සහ බැරකම් ප්‍රකාශ ඉදිරිපත් කර තිබුණේ , දෙමළ ජාතික සන්ධානය නියෝජනය කරන පාර්ලිමේන්තු මන්ත්‍රී එම්. ඒ. සුමන්තිරන් පමණක් බව අපගේ නිරීක්ෂණය විය.

වත්කම් හා බැරකම් ප්‍රකාශ ලබාදී ඇති පාර්ලිමේන්තු මන්ත්‍රීවරුන්ගේ සංඛ්‍යාව තහවුරු කර ගැනීම සඳහා Factseeker  අල්ලස් හෝ දූෂණ චෝදනා විමර්ශන කොමිෂන් සභාවේ නිල වෙබ් අඩවිය පරීක්ෂා කළෙමු. එහිදී 2024.06.30 වන දින තෙක් කොමිසම වෙත ලබාදී ඇති තොරතුරු අනුව සකස් කළ පහත වගුව අපගේ අවධානයට යොමු විය.

වත්කම් ප්‍රකාශ ඉදිරිපත් කළ යුතු පාර්ලිමේන්තු මන්ත්‍රීවරුන් 169 දෙනා අතරින් 116 දෙනෙකු සිය වත්කම් ප්‍රකාශ ලබාදී ඇති බවත්, 53 දෙනෙකු 2024.06.30 වන දින තෙක් ඒවා ලබාදී නොමැති බවත් එහි දැක්විණි.

තවදුරටත් මේ සම්බන්ධයෙන්  Factseeker කළ සොයා බැලීමේදී, 2023 අංක 9 දරණ දූෂණ විරෝධී පනතේ විධිවිධාන ප්‍රකාරව “2023/2024 වර්ෂයේ“ වත්කම් සහ බැරකම් ප්‍රකාශ කිරීමට නියමිත නිලධාරීන් ඇතුළු පුද්ගලයන්ගේ වත්කම් සහ බැරකම් ප්‍රකාශ අල්ලස් හෝ දූෂණ චෝදනා විමර්ශන කොමිෂන් සභාවේ http://ads.ciaboc.lk නිල වෙබ් අඩවිය මගින් ප්‍රසිද්ධ කර තිබෙන ආකාරය Factseeker ට නිරීක්ෂණය කළ හැකි විය.

එහිදී ශ්‍රී ලංකා පාර්ලිමේන්තුවේ ජාතික ජන බලවේගය පක්ෂය නියෝජනය කරන අනුර කුමාර දිසානායක, හරිනි අමරසූරිය සහ විජිත හේරත් යන පාර්ලිමේන්තු මන්ත්‍රීවරුන් තිදෙනා විසින්ම සිය වත්කම් හා බැරකම් ප්‍රකාශ ඉදිරිපත් කර තිබෙන අයුරු අපට අනාවරණය විය.

ඒ අනුව, “වත්කම් ප්‍රකාශ කරල තියෙන්නේ මුළු පාර්ලිමේන්තුවෙන්ම 16 දෙනයි. ජේවීපියේ එකම එක මන්ත්‍රී කෙනෙක්වත් නෑ..!“ ලෙස සඳහන් වූ සමාජ මාධ්‍ය පෝස්ටුවේ දැක්වෙන ප්‍රකාශ මුළුමනින් සාවද්‍ය බව Fact Seeker තහවුරු කරයි.