මෙම ප්‍රකාශය උපුටා දක්වමින් ලංකා සී නිවුස් සහ elakiri (එළකිරි) නැමැති වෙබ් අඩවිය මෙම ප්‍රකාශය පිළිබද ප්‍රවෘත්ති පළ කර තිබිණි. මේ අතර “අපි ශ්‍රී ලංකාව පොදු රාජ්‍ය මණ්ඩලයෙන් ඉවත් කරනවා. අපේ පක්ෂයේ ප්‍රතිපත්ති ප්‍රකාශනයේ ඒක ලිඛිතව සඳහන් කරලා තියෙනවා. ලාල් කාන්ත කියයි.” යනුවෙන් ජාතික පුවත්පතක සිරස්තලයක් උපුටා දක්වන අයුරින් පළකර තිබිණි.

මේ පිළිබඳව අප කළ සොයා බැලීමේදී එබඳු සිරස්තලයක් මෑතකාලීන ජාතික පුවත්පත්වල පළ වී නොමැති බව අපට තහවුරු විිය.

බ්‍රිතාන්‍ය රැජිනගේ ආධිපත්‍යයෙන් යටත් කර ගත් රටවල් ඉන් මිදුණු පසු එම රටවල් වෙනත් ආකාරයකින් යටත්ව තබා ගැනීමට පොදු රාජ්‍ය මණ්ඩලය පිහිටවූ බව ලාල්කාන්ත හිටපු මන්ත්‍රීවරයා එහිදී ප්‍රකාශ කර තිබිණි.

බ්‍රිතාන්‍ය මහ රැජිනගේ ආධිපත්‍ය සහිත පොදු රාජ්‍ය මණ්ඩලයෙන් ශ්‍රී ලංකාව ඉවත් වන බව තම පක්ෂයේ ප්‍රතිපත්ති ප්‍රකාශනයේ ද සදහන් වන බව හෙතෙම එහිදී සදහන් කර ඇත.

ලාල්කාන්ත හිටපු පාර්ලිමේන්තු මන්ත්‍රීවරයා මෙවැනි ප්‍රකාශයක් කළේ ද? යන්න පිළිබදව Fact seeker සොයා බැලුවෙමු.

එහිදී ලාල්කාන්ත හිටපු මන්ත්‍රීවරයා කළ මෙම ප්‍රකාශයේ වීඩියෝවක් X පිටුව හරහා මීට දින කිහිපයක සිට හුවමාරු වෙමින් පැවැති බව නිරීක්ෂණය විය.

මෙම ප්‍රකාශය ලාල්කාන්ත විසින් මෑතකදී කළ ප්‍රකාශයක් ද යන්න පිළිබද සොයා බැලීමේදී අනාවරණය වූයේ ඔහු  2013 නොවැම්බර් මාසයේදී කළ ප්‍රකාශයක් බව ය.

මෙම වීඩියෝව 2013.11.03 වෙනි දින JVP ශ්‍රී ලංකා (JVP Sri Lanka) යූ ටියුබ් නාලිකාව මගින් ප්‍රචාරය කළ වීඩියෝවක් බව ද එහිදී හෙළි විය.

මෙම වීඩියෝව පිළිබඳව ජාතික ජන බලවේගයේ මාධ්‍ය අංශයෙන් අප කළ විමසීමකදී ඔවුන් ප්‍රකාශ කළේ , මෙය ලාල් කාන්ත විසින් මෑත කාලයේ කළ ප්‍රකාශයක් නොවන බවත් පැරණි වීඩියෝවකින් උපුටා ගන්නා ලද කොටසක් මෙසේ යළි සංසරණය වන බවත්ය.

එම වීඩියෝව https://youtu.be/h2gjO05ZWJA?t=1009

ඒ අනුව හිටපු පාර්ලිමේන්තු මන්ත්‍රී කේ.ඩී.ලාල්කාන්ත හිටපු මන්ත්‍රීවරයාගේ මෙම ප්‍රකාශය මෑතකදී කළ ප්‍රකාශයක් නොව 2013 වසරේදී කළ ප්‍රකාශයක් බව Factseeker තහවුරු කරයි.