මෙම සිද්ධිය සම්බන්ධයෙන් පසුගිය 13 වන සිකුරාදා  ‘වීරකේසරී’ පුවත්පතේ, “පොලිස් වෙඩි පහරින් මියගියේ දරුවෙක්ද? තරුණයෙක්ද?” යන සිරස යටතේ ප්‍රවෘත්තියක් පළ කර තිබුණි. එම පුවත් වාර්තාවට අනුව, මියගිය පුද්ගලයාගේ වයස සම්බන්ධයෙන් පොලිසිය නිකුත් කළ නිවේදනවල සත්‍ය නොවන තොරතුරු අඩංගු බවත්, මියගිය පුද්ගලයා 17 හැවිරිදි වියේ පසුවන දරුවෙකු බවත් සඳහන් විය.

කෙසේ වෙතත්, පොලිසිය නිකුත් කළ නිල වාර්තාවේ මියගිය පුද්ගලයාගේ වයස අවුරුදු 19ක් ලෙස සටහන් කර ඇත.

මෙම කරුණ සමාජය තුළ ප්‍රධාන මාතෘකාවක් බවට පත්වීමත් සමඟ, මෙහි සත්‍ය අසත්‍යතාව සොයා බැලීමට FactSeeker කටයුතු කළේය. ඒ අනුව, මෙම සිද්ධිය සම්බන්ධයෙන් පසුගිය 10 වනදා පොලිසිය නිකුත් කළ මාධ්‍ය නිවේදනය සහ ඊට පසුදින (11 වනදා) නිකුත් කළ මාධ්‍ය නිවේදනය අතර මියගිය අයගේ වයස සම්බන්ධයෙන් පරස්පර තොරතුරු දෙකක් අඩංගු වන බව නිරීක්ෂණය විය.

සිංහල සහ දෙමළ මාධ්‍ය ආයතන කිහිපයක්ම මොහු 17 හැවිරිදි දරුවෙකු බව වාර්තා කර තිබුණේ ජනවාරි 10 වනදා පොලිසිය නිකුත් කළ පළමු නිවේදනය පදනම් කරගනිමිනි.

මේ පිළිබඳව FactSeeker පොලිස් මාධ්‍ය ඒකකයෙන් කළ විමසීමේදී, ඔවුන් ප්‍රකාශ කළේ, මියගිය පුද්ගලයා 19 හැවිරිදි තරුණයෙකු බවයි.

නමුත්, මියගිය අයියුබ්රාජ් අරුල් පයාස්ගේ ඥාතීන් සම්බන්ධ කරගෙන ඔහුගේ උප්පැන්න සහතිකය පරීක්ෂා කිරීමේදී, ඔහු 2008 සැප්තැම්බර් මස 11 වන දින උපත ලබා ඇති බව තහවුරු විය. ඒ අනුව, මියයන විට ඔහුගේ වයස අවුරුදු 17යි මාස 3ක් වන බැවින් ඔහු දරුවෙකු බව තහවුරු වේ.

එමෙන්ම, පශ්චාත් මරණ පරීක්ෂණ වාර්තාව අධ්‍යයනය කිරීමේදී, අධිකරණ වෛද්‍ය නිලධාරී රුද්‍රපසුපති මයෝදරන් විසින් මහේස්ත්‍රාත් එම්.එන්.එන්. හුසේන් වෙත යොමු කරන ලද වාර්තාවේද මියගිය පුද්ගලයාගේ වයස අවුරුදු 17ක් ලෙස දක්වා ඇත.

මීට අමතරව, මියගිය අයියුබ්රාජ්ගේ අවමංගල්‍ය උත්සවයේදී ප්‍රදර්ශනය කරන ලද මරණ දැන්වීම් පුවරුවේද ඔහුගේ උපන් දිනය සහ මියගිය දිනය පැහැදිලිව සඳහන් කර තිබුණි.

නිගමනය:

මෙම මරණය සම්බන්ධයෙන් පොලිසිය නිකුත් කළ වාර්තාවල වයස් පරස්පරතාවන් පැවතියද, පොලිසිය අවසාන වශයෙන් තහවුරු කරන ‘අවුරුදු 19’ යන ප්‍රකාශය වැරදි සහගතය. මියගිය අයියුබ්රාජ් අරුල් පයාස්ගේ උප්පැන්න සහතිකය සහ පශ්චාත් මරණ පරීක්ෂණ වාර්තාවට අනුව, මියගිය පුද්ගලයාගේ වයස අවුරුදු 17ක් බව නිශ්චිතවම තහවුරු වේ.