මැතිවරණ කොමිසමේ කාර්ය මණ්ඩල බඳවා ගැනීමක් නැහැ – හුවමාරු වන පණිඩුඩය අසත්‍යයි
ශ්‍රී ලංකා මැතිවරණ කොමිෂන් සභාවට නව සමාජිකයින් බඳවා ගන්නා බව සදහන් කරමින් ඉක්මනින් අයදුම් කරන ලෙස දැක්වෙන සබැඳියක් (link) සහිත පණිඩුඩයක් වට්ස් ඇප් ඇතුළු සමාජ මාධ්‍ය ඔස්සේ හුවමාරු වෙමින් පවතී.
by Anonymous |
දෙසැම්බර් 5, 2024
සමාජ මාධ්‍ය ඔස්සේ හුවමාරු වන පණිවුඩය මෙසේය,
ශ්‍රී ලංකා මැතිවරණ කොමිෂන් සභාව කාර්ය මණ්ඩල බඳවා ගැනීම් 2024/2025
පවතින විවිධ තනතුරු සඳහා නව කාර්ය මණ්ඩල බඳවා ගැනීම සඳහා මාර්ගගත අයදුම්පත් ද්වාරය විවෘත කර ඇති අතර උනන්දුවක් දක්වන අයදුම්කරුවන්ට වහාම අයදුම් කළ හැකි බව ශ්‍රී ලංකා මැතිවරණ කොමිෂන් සභාව මහජනතාවට දන්වා සිටී. උනන්දුවක් දක්වන සියලුම පුරවැසියන් සඳහා අයදුම්පත නොමිලේ වන අතර රැකියා දැනටමත් ආරම්භ කර ඇත. මේ අනගි අවස්ථාව මගහැර ගන්න එපා.
අයදුම්කරුවන් ශ්‍රී ලංකාවේ පුරවැසියන් විය යුතුය. දැන් අයදුම් කිරීමට පහත සබැඳිය ක්ලික් කරන්න.
දැන් අයදුම් කරන්න👇” යනුවෙන් එහි සඳහන් කර තිබේ.
විශාල පිරිසක් මේ සම්බන්ධයන් උනන්දු වී ඇති බැවින් මෙහි සත්‍ය අසත්‍යතාවය සොයා බැලීමට factseeker කටයුතු කළේය.
ශ්‍රී ලංකා මැතිවරණ කොමිෂන් සභාවට නව සමාජිකයින් බඳවා ගන්නේ නම්, ඒ පිළිබඳව ගැසට් පත්‍රයක් මගින් ප්‍රකාශයට පත් කරන අතර එවැනි පළ කිරිමක් සිදුකර නොමැති බව මේ සම්බන්ධයෙන් නිරීක්ෂණය කිරීමේදි අනාවරණය විය.
එමෙන්ම මේ සම්බන්ධයෙන් මැතිවරණ කොමිෂන් සභාවෙන් විමසීමේදී, මැතිවරණ කොමසාරිස් ජනරාල් සමන් ශ්‍රි රත්නායක මහතා පැවසුවේ, එලෙස කාර්ය මණ්ඩල බඳවා ගැනීමක් සිදුනොවන බවත් එය සම්පුර්ණයෙන්ම අසත්‍යයක් බවත්ය. එමෙන්ම මේ පිළිබඳව මැතිවරණ කොමිෂන් සභාවට ද පැමිණිලි ලැබී ඇති බව ද සඳහන් කළේ ය.
මෙවැනි අසත්‍ය පණිඩුව තුළ ඇතුළත් කර ඇති සබැඳි (link) වෙත ප්‍රවේශවීමට පෙර එවැනි පණිඩුඩ සත්‍ය ද? අසත්‍ය ද? යන්න පිළිබඳව සොයා බලා කටයුතු කිරීම අතිශය වැදගත් බව පරිගණක හදිසි ප්‍රතිචාර සංසදය (Sri Lanka CERT) සඳහන් කරයි. එවැනි නොදන්නා සබැඳි (link) වෙත ප්‍රවේශ වීමේදි තම පෞද්ගලික දත්ත වැනි දෑ සොරා ගැනීමට හැකියාව ඇති බව ද ඔවුන් වැඩිදුරටත් පෙන්වා දෙයි.
