තමන්ගේ ගෙදර ලිපිනය ලියූ කඩදාසියක් රැගෙන තමන් නැති වූ බව කියමින් දැන් පාරවල්වල ළමයි සිටින බවත් ඒ හරහා අපරාධ සඳහා පුද්ගලයින් යොමු කර ගන්නා බවත් සඳහන් කරමින් ඇති මෙම පණිඩුඩයේ සත්‍ය අසත්‍යතාවය පිළිබඳව factseeker සොයා බැලීය.

WhatsApp හරහා හුවමාරු වන පණිඩුඩය මෙසේය,

හදිසි දැනුම්දීමක්

සියලුම පොලිස් ස්ථානවල සිට සියලුම පුරවැසියන්ට.

තමන්ගේ ගෙදර ලිපිනය ලියූ කඩදාසියක් රැගෙන තමන් නැති වූ බව කියමින් දැන් පාරවල්වල ළමයි සිටිති.  ඔබ මෙම දරුවන් දුටුවහොත්, ලිඛිත ලිපිනයට ඔවුන් රැගෙන නොයන්න, මන්ද ඔබව මරා දැමීමට, ඔබේ සතු භාණ්ඩ,අවයව සොරකම් කිරීමට හෝ දූෂණය කිරීමට මිනිසුන් ඔබ එනතුරු බලා සිටින බැවින්, ඔවුන් ළඟම ඇති පොලිස් ස්ථානයට හෝ ළඟම ඇති හදිසි මුර සංචාරයට ගෙන යන ලෙස අපි ඔබෙන් ඉල්ලා සිටිමු.  සහ වහාම ඒවා වාර්තා කරන්න.

කරුණාකර මෙය සංසරණය කරන්න.  කාරණය සැබෑ වන අතර, ඔවුන් ළඟම ඇති පොලිස් ස්ථානයට හෝ ඔබ සොයා ගන්නා ළඟම ඇති මුර සංචාරයට භාර දෙන බව අපි තහවුරු කරමු.  වීරයෙකු වීමට හෝ හොඳ සමරිතානුවරයෙකු වීමට උත්සාහ නොකරන්න.

මෙය ඔබගේ සියලු සම්බන්ධතා වෙත යවන්න.

අභ්‍යයන්තර කටයුතු අමාත්‍යයාංශය.

මෙය අභ්‍යයන්තර කටයුතු අමාත්‍යයාංශයේ පණිඩුඩයක් ලෙස සඳහන් කර ඇති අතර එවැනි අමාත්‍යාංශයක් මෙරට ක්‍රියාත්මක නොවේ. කෙසේ වෙතත් අභ්‍යන්තර කටයුතු සිදුවන ස්වදේශ කටයුතු   අමාත්‍යාංශයේ නිල වෙඩ් අඩවියේ හෝ මාධ්‍ය නිවේදන ලෙස එය ප්‍රකාශයට පත්කර ඇත්දැයි මුලින්ම සොයාබැලු අතර එවැන්නක් පළකර නොතිබුණි.

එමෙන්ම මේ සම්බන්ධයෙන් ප්‍රධාන මාධ්‍ය පුවත් පළකර ඇත්දැයි සොයා බැලු අතර එවැනි පුවත් පළ කිරීමක්ද සිදුකර නොමැති බව නිරීක්ෂණය විය.

මෙම පණිඩුඩය සම්බන්ධයෙන් පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දූවගෙන් මෙය විමසු අතර පොලිසිය මෙවැනි  නිවේදනයක් නිකුත් කර නොමැති බව හෙතෙම සඳහන් කළේය.

මේ සම්බන්ධයෙන් factseeker වැඩිදුර සොයාබැලීමේදී අනාවරණය වුයේ මෙය 2022 වසරේදී ඉංග්‍රිසි භාෂාවෙන් වෙනත් රටවල හුවමාරු වී ඇති බවයි . එහි සිංහල පරිවර්තනයක් ලෙස මෙම පණිඩුඩය හුවමාරු වන අතර එය සම්පුර්ණයෙන් අසත්‍ය පණිඩුඩයක් බව  factseeker තහවුරු කරයි.