පාසල් අධ්‍යාපනයෙන් සෞන්දර්ය විෂය ඉවත් කරනවා ද?
පාසල් පද්ධතිය තුළ මෙතෙක් ඉගැන්වූ සෞන්දර්ය විෂයය ඉවත් කිරීමට බලධාරීන් යෝජනා සකස් කර තිබෙන බව පාසල් සුරැකීමේ ජනතා ව්‍යාපාරයේ ලේකම් නාගස්තැන්නේ අරුණ හිමියෝ ප්‍රකාශ කළ බව අද (16) ̒මව්බිම පුවත්පත වාර්තා කර තිබිණි.
by Anonymous |
ජූලි 16, 2024
“සෞන්දර්ය විෂයයන් පාසලෙන් ඉවත් කිරීමේ යෝජනාවක් – පාසල් සුරැකීමේ ව්‍යාපාරය කියයි” යන ශීර්ෂ පාඨය යටතේ ̕මව්බිම පුවත්පතේ මුල් පිටුවේ මෙම පුවත පළ කර ඇත.
නව අධ්‍යාපන ප්‍රතිසංස්කරණ යෝජනා අනුව බලධාරීන් මෙම තීරණය ගෙන ඇතැයි ඒ හිමියෝ එහිදී ප්‍රකාශ කර ඇති අතර හික්මුණු මෙන්ම දරාගැනීම සහිත පුද්ගලයෙකු ගොඩනැගීමට සෞන්දර්ය විෂය ඉවහල් වන බව නාගස්තැන්නේ අරුණ හිමි ප්‍රකාශ කළ බව එම ප්‍රවෘත්තියේ වැඩිදුරටත් සදහන් කර තිබේ.
මෙම පුවත සත්‍ය ද යන්න පිළිබද සොයා බැලීමට Factseeker අධ්‍යාපන අමාත්‍යංශයේ මාධ්‍ය ඒකකයෙන් කළ විමසීමකදී ඔවුන් ප්‍රකාශ ක‌ළේ, එම පුවත සම්පූර්ණයෙන් අසත්‍ය බවයි.
මේ සම්බන්ධයෙන් අධ්‍යාපන අමාත්‍යංශය මාධ්‍ය නිවේදනයක් ද නිකුත් කර තිබේ.
යෝජිත නව අධ්‍යාපන ප්‍රතිසංස්කරණවලට අනුව සෞන්දර්ය විෂය සාමාන්‍ය අධ්‍යාපනයේ අත්‍යාවශ්‍ය අංගයක් වන බව එම නිවේදනයේ සදහන් වෙයි.
කණිෂ්ඨ, ද්විතීයික අධ්‍යාපනයේ හා ජ්‍යෙෂ්ඨ අධ්‍යාපනයේදී සෞන්දර්ය විෂයයන් වැඩිදුරටත් අධ්‍යාපනය කළ හැකි අතර අධ්‍යයන පොදු සහතික පත්‍ර සාමාන්‍ය පෙළ විභාගයේ සහ උසස් පෙළ විභාගයේදී සිසුන්ට සෞන්දර්ය විෂයයන් සදහා පෙනී සිටිය හැකි බව ද එම නිවේදනයේ සදහන් වේ.
යෝජිත නව අධ්‍යාපන ප්‍රතිසංස්කරණ සම්බන්ධයෙන් සැකයක් ඇති වන ප්‍රකාශ හා විවිධ මාධ්‍ය උපයෝගී කර ගෙන කරනු ලබන සාවද්‍ය ප්‍රකාශ අධ්‍යාපන අමාත්‍යංශය විසින් බැහැර කරන බව එම නිවේදනයේ වැඩිදුරටත් සදහන් කර ඇත.
ඒ අනුව පාසල් පද්ධතියෙන් සෞන්දර්ය විෂයය ඉවත් කරන බවට ̒මව්බිම පුවත්පත පළ කළ පුවත සාවද්‍ය බව Factseeker තහවුරු කරයි.
අධ්‍යාපන අමාත්‍යංශය නිකුත් කළ මාධ්‍ය නිවේදනය මෙසේ ය.
