පාර්ලිමේන්තු මන්ත්‍රී රාමනාදන් අර්චුනා පිළිබඳ උපහාසාත්මක පළකිරීමක්
අද(19) දින කොළඹ - අලුත්කඩේ මහේස්ත්‍රාත් අධිකරණයේ වෙඩි තැබීමේ සිද්ධියට සම්බන්ධ පුද්ගලයා වත්මන් පාර්ලිමේන්තු මන්ත්‍රී රාමනාදන් අර්චුනා බව සඳහන් කරමින් උපහාසාත්මක කෝණයෙන් සමාජ මාධ්‍යවල හුවමාරු වන ඡායාරූප කිහිපයක් FactSeeker අවධානයට ලක් විය.
by Anonymous |
පෙබරවාරි 19, 2025
අද(19) දින කොළඹ – අලුත්කඩේ මහේස්ත්‍රාත් අධිකරණයේ වෙඩි තැබීමේ සිද්ධියට සම්බන්ධ පුද්ගලයා වත්මන් පාර්ලිමේන්තු මන්ත්‍රී රාමනාදන් අර්චුනා බව සඳහන් කරමින් උපහාසාත්මක කෝණයෙන් සමාජ මාධ්‍යවල හුවමාරු වන ඡායාරූප කිහිපයක් FactSeeker අවධානයට ලක් විය.
මෙම සිද්ධියට අදාළව නිකුත් කර ඇති සීසීටීවී දර්ශනවල සටහන් වී ඇති සැකකරුගේ මුහුණ සහ පාර්ලිමේන්තු මන්ත්‍රී රාමනාදන් අර්චුනාගේ මුහුණ සමාන බව දක්වමින් එවැනි සමාජ මාධ්‍ය සටහන් හුවමාරු වන බව අපට නිරීක්ෂණය විය.
මේවා උපහාසාත්මක ලෙස බෙදා ගත් පළකිරීම් වුවත් බොහෝ දෙනෙකු ඒ ගැන ප්‍රශ්න කර තිබෙනු නිරීක්ෂණය විය. ඒ ඔස්සේ ඇතැමෙකු එම පළකිරීම් සත්‍ය ලෙස විශ්වාස කිරීමට ඇති හැකියාව සලකා FactSeeker මෙහි කරුණු පරීක්ෂා කළේය.
අද උදෑසන මෙම වෙඩි තැබීම සිදු වන අවස්ථාව වන විට පාර්ලිමේන්තු මන්ත්‍රී රාමනාදන් අර්චුනා පාර්ලිමේන්තු විවාදය සඳහා සහභාගී වෙමින් සිටියේය.
මේ අතර අද දින උදෑසන සිදු වූ ඝාතනයේ ප්‍රධාන සැකකරු පුත්තලම පාලවිය ප්‍රදේශයේදී පොලිස් විශේෂ කාර්ය බලකාය (STF) විසින් අත්අඩංගුවට ගෙන තිබේ.
ඒ අනුව, මෙවැනි පළකිරීම් උපහාසාත්මක ලෙස සමාජ මාධ්‍යවල බෙදා ගන්නා නමුත්, ඒවා සමාජය තුළ බොහෝ වැරදි වැටහීම් ඇති වීමට පාදක විය හැක. එබැවින්, එවැනි අවස්ථාවලදී, විනෝදය පිණිස හෝ එවැනි වැරදි තොරතුරු බෙදා ගැනීමෙන් වළකින ලෙස FactSeeker ඔබට සිහිපත් කරයි.
