මෙම වසරේ ජනවාරි මාසයේ පමණක් වන අලින් 43 ක් සහ පුද්ගලයින් තිදෙනෙකු ජීවිතක්ෂයට පත් වී ඇති බව එම දත්ත වාර්තා අනාවරණය කරයි.
පසුගිය කාලය තුළ දිගින් දිගටම වන අලින් මිය යාම නිසා වනජීවී සංරක්ෂණ දෙපාර්තමේන්තුවෙන් Factseeker ලිඛිත ඉල්ලීමක් කළේ ය. එහිදී ඔවුන් ලබා දුන් දත්ත Factseeker කළ විශ්ලේෂණයකින් අනතුරුව මෙම තොරතුරු අනාවරණය කරයි.

විශේෂයෙන් ම වෙඩි වැදීම්, විදුලිසැර වැදීම් සහ හක්ක පටස් ආහාරයට ගැනීම හේතුවෙන් වැඩි වශයෙන් වන අලින් ජීවිතක්ෂයට පත් වන බව එහිදී අනාවරණය විය. පසුගිය 2019 වසරේ සිට 2024 වසර දක්වා ගතවූ වසර හය තුළ සංඛ්‍යාත්මක වශයෙන් ගත් විට, වෙඩි වැදීම් හේතුවෙන් වන අලි 409කුත්, හක්කපටස් ආහාරයට ගැනීමෙන් 356ක් සහ විදුලි සැර වැදීමෙන් වන අලි 316කුත් ජීවිතක්ෂයට පත් වී ඇත.

මෙම කාල වකවානුව තුළ වැඩිම පුද්ගල මරණ සංඛ්‍යාවක් වාර්තා වී ඇත්තේ, අනුරාධපුර දිස්ත්‍රික්කයෙන් වන අතර එම සංඛ්‍යාව 185කි.

පසුගිය වසර හය තුළ වැඩිම අලි මරණ සංඛ්‍යාවක් සිදුව ඇත්තේ 2023 වර්ෂයේදී වන අතර එම සංඛ්‍යාව 488කි. නමුත් වන ජීවී කලාප අනුව සංඛ්‍යා දත්ත විශ්ලේෂණය කර බැලීමේදී පසුගිය වසර හය තුළ වැඩිම වන අලි මරණ සංඛ්‍යාවක් සහ වාර්තා වී ඇත්තේ පොළොන්නරුව වන ජීවී කලාපයෙනි. එම අලි මරණ ප්‍රමාණය 487කි. වැඩිම දේපල හානි සංඛ්‍යාවක් වාර්තා වී ඇත්තේ ද පොළොන්නරුව කලාපයෙනි. එය පුද්ගලයින් ලෙස ගත් කළ පුද්ගලයින් 3236 දෙනෙකු ලෙස ගණන් බලා ඇත.

කෙසේ නමුත් අලි – මිනිස් ගැටුම් හේතුවෙන් සිදු වී තිබෙන දේපල හානි පිළිබඳව දත්ත විශ්ලේෂණය කිරීමේදී FactSeeker හඳුනා ගත්තේ, 2024 දී පුද්ගලයින් 3756 දෙනෙකු දේපල හානිවලට මුහුණ දී ඇති බවයි. එය පසුගිය වසර හය තුළ වාර්තා වූ වැඩිම දේපල හානි සංඛ්‍යාව ලෙස සැලකිය හැකිය.