නිල ඡන්ද පත්‍රිකාව (Ballot Paper) නැතිව ඡන්දය ප්‍රකාශ කළ හැකි බව මැතිවරණ කොමසාරිස් කිව්වා ද?
"අපේක්‍ෂකයන්ට තම නම ලැයිස්තුවට ඇතුළත් වුවහොත් ඡන්ද පත්‍රිකාවක් නොමැතිව වුවද ඡන්දය ප්‍රකාශ කළ හැකියි" යනුවෙන් මැතිවරණ කොමසාරිස් ජෙනරාල් සමන් ශ්‍රී රත්නායක මහතා පැවසූ බව අද (2024.09.20) පළ වූ වීරකේසරි දිනපතා පුවත්පතේ මුල් පිටුවේ පුවතක් පළ කර ඇත.
by Anonymous |
සැප්තැම්බර් 20, 2024
මෙම පුවත පදනම් කරගෙන X අඩවියේ සහ අනෙකුත් සමාජ ජාල පිටුවල අදහස් හුවමාරු වෙමින් පැවති අතර මේ පිළිබඳ සත්‍ය කරුණු තහවුරු කරන ලෙස FactSeekerගෙන් ඉල්ලීම් කර තිබුණි.
වීරකේසරි පුවත්පත වාර්තා කර තිබුණේ ඊයේ (2024.09.19) රජයේ ප්‍රවෘත්ති දෙපාර්තමේන්තුවේ පැවති ප්‍රවෘත්ති සාකච්ඡාවකදී ඔහු මේ බව පැවසූ බවයි.
ඊයේ (2024.09.19) පැවති මාධ්‍ය හමුවේදී මැතිවරණ කොමිසමේ සභාපති ආර්.එල්.ඒ.එම් රත්නායක කළ ප්‍රකාශය සිරස Newsfirst පළ කරන ලද ප්‍රවෘත්තිය අප මෙහි අමුණා ඇත.
https://www.youtube.com/watch?v=4ffeAiKcR68
අදාළ ප්‍රවෘත්ති සාකච්ඡාවේ සම්පූර්ණ වීඩියෝවට අදාළ සබැඳිය පහතින්.
https://www.facebook.com/share/v/KGFofBXobhVNEuXZ/
එහිදී, මැතිවරණ කොමසාරිස් ජනරාල්වරයා විසින් එවැනි කිසිදු දැනුම්දීමක් සිදු කර නොමැති බව අපට නිරීක්ෂණය විය.
එහිදී, මැතිවරණ කොමිෂන් සභාවේ සභාපති ආර්. එම්. ඒ. එල්. රත්නායක මහතා සඳහන් කළේ මෙතෙක් නිල ඡන්ද දැන්වීම් පත්‍රිකා නොලැබුණු පුද්ගලයින් සිටී නම් ඒවා තමාට අදාළ තැපැල් කාර්යාලවලින් තවදුරටත් ලබා ගැනීමේ හැකියාව පවතින අතර අවශ්‍ය නම් මැතිවරණ කොමිෂන් සභාවේ නිල වෙබ් අඩවියට පිවිසීමෙන්ද එහි නිල පිටපතක් ලබා ගත හැකි බවයි.
එමෙන්ම නිල ඡන්ද දැන්වීම් පත්‍රිකාව ඡන්දය දැමීම සඳහා අනිවාර්ය අවශ්‍යතාවක් නොවන බවත්, අදාළ තැනැත්තා සතුව වලංගු හැඳුනුම්පතක් තිබේ නම් එය ඉදිරිපත් කර ඡන්දය ප්‍රකාශ කළ හැකි බව ඔහු එහිදී පෙන්වා දුන්නේය.
එසේ භාවිත කළ හැකි වලංගු අනන්‍යතා ලේඛන ලැයිස්තුවක් මැතිවරණ කොමිෂන් සභාවේ සභාපතිවරයා එහිදී ඉදිරිපත් කළේය.
- පුද්ගලයින් ලියාපදිංචි කිරීමේ දෙපාර්තමේන්තුව මගින් නිකුත් කර ඇති ජාතික හැඳුනුම්පත
- වලංගු විදේශ ගමන් බලපත්‍රය
- වලංගු රියදුරු බලපත්‍රය
- රාජ්‍ය සේවා විශ්‍රාමික හැඳුනුම්පත (විශ්‍රාම වැටුප් දෙපාර්තමේන්තුව විසින් නිකුත් කළ)
- වැඩිහිටි හැඳුනුම්පත (ප්‍රාදේශීය ලේකම් කාර්යාලය විසින් නිකුත් කළ)
- පුද්ගලයින් ලියාපදිංචි කිරීමේ දෙපාර්තමේන්තුව මගින් නිකුත් කරනු ලබන පූජ්‍ය / පූජක හැඳුනුම්පත
- පුද්ගලයින් ලියාපදිංචි කිරීමේ දෙපාර්තමේන්තුව මගින් නිකුත් කරනු ලබන ජාතික හැඳුනුම්පත් තොරතුරු තහවුරු කිරීමේ ලිපිය
- ආබාධිත තැනැත්තන් සඳහා මැතිවරණ කොමිෂන් සභාව විසින් නිකුත් කරනු ලබන තාවකාලික හැඳුනුම්පත
- මැතිවරණ කොමිෂන් සභාව මගින් නිකුත් කරනු ලබන තාවකාලික හැඳුනුම්පත
ඒ අනුව, ඡන්ද පත්‍රිකාවක්(ballot paper) නොමැතිව ඡන්දය ප්‍රකාශ කළ හැකි බවට වීරකේසරී පුවත්පත වැරදි පුවතක් පළකර ඇති බවත්, “ලැයිස්තුවේ නම ඇතුළත් කළහොත් ඡන්ද පත්‍රිකාවකින් තොරව ඡන්දය ප්‍රකාශ කළ හැකි” බව මැතිවරණ කොමසාරිස් ජෙනරාල් සමන් ශ්‍රී රත්නායක නොපැවසූ බවත් FactSeeker තහවුරු කරයි.
