එම නිසා මෙහි කරුණු පරීක්ෂා කිරීමට FactSeeker කටයුතු කළේය.

මෙම සමාජ මාධ්‍ය පෝස්ටු නිරීක්ෂණය වීමෙන් පසු මෙම සිදුවීම ප්‍රධාන ධාරාවේ මාධ්‍ය වාර්තා කර තිබේද? යන්න අපි පරීක්ෂා කළෙමු.

එහිදී පාර්ලිමේන්තු මන්ත්‍රී දයාසිරි ජයසේකර මේ පිළිබඳව කළ ප්‍රකාශයක් ඊයේ (25) හිරු නාලිකාවේ ප්‍රවෘත්ති විකාශයේ පළ කර තිබෙන වීඩියෝවක් හමු විය.

https://www.facebook.com/share/v/1BDjQEzytZ/

තවද එම ප්‍රකාශය ඊයේ (25) අරුණ පුවත්පත ද වාර්තා කර තිබිණි. ඒ “නියෝජ්‍ය ඇමති වැසිකිළියක් විවෘත කරලා ෆේස්බුක් දාලා ” යනුවෙනි.

ඒ අනුව මෙහි සත්‍යාසත්‍යතාව සොයා බැලීම සඳහා FactSeeker නිවාස නියෝජ්‍ය අමාත්‍යවරයාගේ මාධ්‍ය අංශයෙන් කළ විමසීමේදී පහත මාධ්‍ය නිවේදනය අප වෙත යොමු කළේ ය.

එහි දැක්වුණේ, සමාජ මාධ්‍ය ඔස්සේ පළ වන ඡායාරූප සහ තොරතුරු මීට වසර 5ක පමණ පෙර පොළොන්නරුව ප්‍රදේශයේ ක්‍රියාකාරී තරුණයින් පිරිසක් සමග කළ සමාජ සත්කාරක සේවාවකදී ගත් ඡායාරූප බව යි. ඒ ප්‍රදේශයේ අසරණ පවුලකට වැසිකිළියක් සාදා දෙන ලද අවස්ථාවක් බව ද එම නිවේදනයේ සඳහන් කර තිබිණි.

ඒ සඳහා කිසිදු උත්සවයක් හෝ පවත්වා නැති අතර වසර පහකට පමණ පෙර කළ සමාජ සුභසාධන ක්‍රියාවක් බව එමගින් දැක්විණි.

මෙම කරුණ පරීක්ෂා කිරීම සඳහා FactSeeker  ටී. බී. සරත් නියෝජ්‍ය අමාත්‍යවරයාගේ සමාජ මාධ්‍ය ගිණුම් පරීක්ෂා කළ අතර මෑත කාලීනව භාවිත කරන සමාජ මාධ්‍ය ගිණුම්වල ඒ සම්බන්ධයෙන් කිසිවක් පළ කර නොතිබිණි. නමුත් 2019 මාර්තු 4 දින ඔහුගේ වෙනත් ෆේස්බුක් ගිණුමක එම අවස්ථාව දැක්වෙන පෝස්ටුවක් පළ කර තිබිණි.

https://www.facebook.com/share/p/1BLKNsteY4/

ඒ අනුව, දයාසිරි ජයසේකර මන්ත්‍රීවරයා මේ සම්බන්ධයෙන් කළ ප්‍රකාශයත් ඒ මත පදනම්ව මාධ්‍ය හරහා පළ කර පුවත් හා සමාජ මාධ්‍ය ඔස්සේ සංසරණය වන ඡායාරූප පැරණි සිදුවීමකට අයත් ඒවා බව FactSeeker සනාථ කරයි.