වත්මන් රජය බලයට පත් වීමෙන් පසු මේ වන විට ඩීසල් මිල රුපියල් 120 කින් අඩු කර තිබෙන බව නියෝජ්‍ය අමාත්‍ය නාමල් කරුණාරත්න කළ ප්‍රකාශයක් සමාජ මාධ්‍ය ඔස්සේ හුවමාරු වෙයි.
එම පුවත පහතින්:
https://www.facebook.com/share/v/1EMJNvrcjS/

ගතවූ මාස කිහිපය ඇතුළත ඩීසල් මිල රුපියල් 120 කින් අඩු කර ඇති අතර පෙට්‍රල් සහ භූමිතෙල්වල මිලද පහත ගොස් ඇති බවත් මේ මගින් ජනතාවට සහන රැසක් ලැබී තිබෙන බවත් නාමල් කරුණාරත්න නියෝජ්‍ය ඇමතිවරයා මෙහිදී වැඩිදුරටත් සඳහන් කරයි.
ඒ අනුව නියෝජ්‍ය ඇමැතිවරයාගේ ප්‍රකාශය සත්‍යද? යන්න පිළිබඳව factseeker කරුණු පරීක්ෂා කළේ ය.

මෙහිදී අපි මෙරට ඉන්ධන මිල සම්බන්ධයෙන් ඛනිජ තෙල් නීතිගත සංස්ථාව නිකුත් කළ නිවේදන වෙත අවධානය යොමු කළෙමු.
පසුගිය ජනාධිපතිවරණය පැවැතියේ 2024 සැප්තැම්බර් 21 වෙනිදා ය. අනුර කුමාර දිසානායක ජනාධිපති ධූරයේ දිවුරුම් දීමෙන් පසු ඛනිජ තෙල් නීතිගත සංස්ථාව 2024 සැප්තැම්බර් 30 නිකුත් කළ මාධ්‍ය නිවේදනය වෙත අප අවධානය යොමු කළේය. එහිදී රුපියල් 307.00 ක් ලෙස පැවැති ලංකා සුදු ඩීසල් ලීටරයක් මිල රුපියල් 283.00 දක්වා අඩු කර තිබිණි. එමෙන්ම රුපියල් 352.00 ක් ලෙස පැවැති ලංකා සුපිරි ඩීසල් 4 ස්ටාර් යූරෝ 4 ලීටරයක මිල රුපියල් 319.00 ක් දක්වා ද 332.00 ක් ලෙස පැවැති ලංකා පෙට්‍රල් 92 ඔක්ටේන් ලීටරයක මිල රුපියල් 311.00 දක්වා ද අඩු වී තිබිණි.

කාංචන විජේසේකර විදුලිබල හා බලශක්ති අමාත්‍යවරයා ලෙස 2022 නොවැම්බර් මස 19 වෙනිදා කැබිනට් මණ්ඩලයට ඉදිරිපත් කළ යෝජනාවකට අනුව මසකට වරක් ඉන්ධන මිල සංශෝධනය කිරීම 2022 දෙසැම්බර් මාසයේ සිට ක්‍රියාත්මක කෙරිණි.
එ් අනුව මසකට වරක් ඉන්ධන මිල සංශෝනය කෙරුණු අතර අනුර කුමාර දිසානායක ජන‍ාධිපති ධුරයට පත් වීමෙන් පසුව ද මසකට වරක් ඉන්ධන මිල සංශෝධනය කෙරුණි.එහිදී මිල අඩු වූ අවස්ථා මෙන්ම ඉන්ධන මිල වැඩි වූ අවස්ථා ද තිබිණි.
ඒ මෙසේ ය.

වත්මන් රජය අවසන් වරට එනම්, 2025 අගෝස්තු මස 31 වන දින කළ ඉන්ධන මිල සංශෝධනයේදී රුපියල් 289.00 ක් ලෙස පැවැති ලංකා සුදු ඩීසල් ලීටරයක මිල රුපියල් 283.00 දක්වා අඩු කළේ ය. සමස්තයක් ලෙස බැලූ විට සුදු ඩීසල් ලීටරයක් රුපියල් 6 කින් ද ,සුපිරි ඩීසල් ලීටරයක මිල රුපියල් 12 කින් ද, ලංකා පෙට්‍රල් 92 ඔක්ටේන් ලීටරයක මිල රුපියල් 6 කින් ද ආදී වශයෙන් මිල ගණන් පහත ගොස් ඇති බවත් ඔක්ටේන් 95 පෙට්‍රල් සහ භූමිතෙල් වල මිල මෙම මස සංශෝධනය නොවන බවද ලංකා ඛනිජ තෙල් නීතිගත සංස්ථාව නිවේදනය කර ඇති බවයි.

මෙම කරුණු අනුව බැලූ කළ 2024.09.30 වනදා වන විට ලංකා සුදු ඩීසල් ලීටර් 1ක් රු.307ක් ලෙස සටහන් වී පසුව වසරක් තුළ මිල සංශෝධනය වී 2025.08.31 වනදා වන විට එය රු.283.00 ක් බවට පත්වී ඇත. ඒ අනුව එම අගයන් සසදා බලන විට එහි වෙනස රු.24.00 ක් ලෙස සටහන් වේ. මේ අනුව අමාත්‍යවරයා සදහන් කරන පරිදි රු.120 ක අඩුවීමක් වී නොමැත.ඊට පෙර අවස්ථා වලද එවැනි අගයකින් මිල අඩුවීමක් පෙන්නුම් නොකරන බව FactSeeker අප කළ විමර්ෂණයන්ගෙන් ද තහවුරු විය.

මීට අමතරව වත්මන් රජය බලයට පත් වීමෙන් පසු ඩීසල් මිල රුපියල් 120 කින් අඩු වී ඇති බව නියෝජ්‍ය ඇමැති නාමල් කරුණාරත්න කළ ප්‍රකාශය අසත්‍ය බව දෙරණ අරුණ වැඩසටහනකදී චතුර අල්විස් ද විවේචනයට ලක් කර තිබූ ආකාරය ද අපට දැකගත හැකි විය. එම වීඩීයෝව පහතින්:
https://www.facebook.com/share/v/19NXVsoSSo/
ඒ අනුව නව තෙල් මිල සංශෝධනය සම්බන්ධව නියෝජ්‍ය අමාත්‍ය නාමල් කරුණාරත්න මහතා කළ ප්‍රකාශය සාවද්‍ය බව fact seeker තහවුරු කරයි.