හිටපු පොලිස්පති දේශබන්දු තෙන්නකෝන් සම්බන්ධයෙන් අධිකරණය ලබා දුන් තීන්දුවට එරෙහිව එක්සත් ජතික පක්ෂය නිකුත් කළ ලිපියක් සමාජ මාධ්‍ය හරහා සංසරණය වෙයි.
” දේශබන්දු තෙන්නකෝන් මහතාට ලබාදුන් අත්තනෝමතික තීන්දුව” යන ශීර්ෂ පාඨය යටතේ එක්සත් ජාතික පක්ෂ නිල ලාංජනය සහිත ලිපි ශීර්ෂයක එහි සභාපති වජිර අබේවර්ධනගේ අත්සනින් යුතුව 2025.07.22 දිනැතිව මෙම ලිපිය සමාජ මාධ්‍යයේ සංසරණය වන අයුරු Factseeker නිරීක්ෂණය කළේ ය.

” ශ්‍රී ලංකා පොලීසියේ කීර්තිනාමයට කලු පැල්ලමක් එකතු කිරීමට වර්තමාන ආණ්ඩුව අද දිනයේ ඉතිහාස ගත වන තීන්දුවක් ලබා දී තිබේ.ශ්‍රී ලංකා පොලිස් දෙපාර්තමේන්තුවේ ක්‍රියාශීලිව හා සහ නීතියේ ආධිපත්‍ය තහවුරු කිරීමට දිවි හිමියෙන් කැපවූ දේශබන්දු තෙන්නකෝන් මහතා එක්තරා කමිටුවක අනුහසින් ධූරයෙන් පහ කිරීම අරබයා වැරදි පිට වැරදි පටවා ඔහුගේ ප්‍රතිරූඵයට හානි වන ආකාරයට වර්තමාන රජය කටයුතු කිරීම අයුක්ති සහගතය” යනුවෙන් එම ලිපියේ සඳහන් කර තිබිණි.
එම ලිපිය පහතින්

මෙවැනි ලිපියක් එක්සත් ජාතික පක්ෂය නිකුත් කළේ ද? යන්න පිළිබඳව Factseeker කරුණු පරීක්ෂා කළේ ය.
ඒ අනුව අපි අද ප්‍රධාන ධාරාවේ පුවත්පත් වෙබ් අඩවි නිරීක්ෂණය කළ අතර එවැනි ලිපියක් පළ කර ඇති බව දැක ගැනීමට නොහැකි විය.
එක්සත් ජාතික පක්ෂයේ නිල වෙබ් අඩවියේ එවැනි ලිපියක් තිබේද? යන්න නිරීක්ෂණය කළ ද එහිද එවැනි ලිපියක් පළ කර නොතිබිණි.
ඉන්පසු එක්සත් ජාතික පක්ෂ නිල ෆේස්බුක් පිටුව පරීක්ෂා කිරීමේදී මේ සම්බන්ධයෙන් වන සටහනක් හමු විය. එහි සඳහන් වූයේ මෙම ලිපිය එය ව්‍යාජ ලිපියක් බවට දක්වා තිබිණි.
එම සටහන මෙතැනින් – https://www.facebook.com/share/p/19gtXGwryp/

වජිර අබේවර්ධන ද සිය ෆේස්බුක් පිටුවේ මෙම ලිපිය ව්‍යාජ ලිපියක් බව සඳහන් කර ඇත.
එය මෙතැනින් – https://www.facebook.com/share/p/198sVnG75P/

“දේශබන්දු තෙන්නකෝන් මහතාට ලබාදුන් අත්තනෝමතික තීන්දුව සම්බන්ධව“ මැයෙන් සමාජ මාධ්‍ය තුළ සංසරණය වන ලිපිය සම්පූර්ණයෙන්ම ව්‍යාජ්‍යයි. එම ලිපිය එක්සත් ජාතික පක්ෂයේ ලිපි ශීර්ෂය යොදාගනිමින් ව්‍යාජ ලෙස සකස් කර ඇති අතර එවැනි කිසිඳු ලිපියක් මා විසින් හෝ එක්සත් ජාතික පක්ෂය විසින් නිකුත් කර නොමැත. මේ සම්බන්ධයෙන් ඉදිරියේදී නීතිමය පියවර ගැනීමට නියමිතයි.” යනුවෙන් වජිර අබේවර්ධනගේ සටහනේ දක්වා තිබිණි.

ඒ අනුව “දේශබන්දු තෙන්නකෝන් මහතාට ලබාදුන් අත්තනෝමතික තීන්දුව” මැයෙන් සමාජ මාධ්‍යයන්හි ප්‍රචාරය වන ලිපිය ව්‍යාජ ලිපියක් බව Factseeker තහවුරු කරයි.