මහනුවර ශ්‍රී දළදා මාලිගාවේ කරඬුව සහ රුහුණු කතරගම දේවාලයේ දේවාභරණ වඩමවන “තායි රාජා” සහ “කැළනි කණ්ඩුල” ඇතුන් දෙපළ නිසි ලෙස රැක බලා නොගන්නා බව පවසා තායිලන්ත රජයට නැවත පවරා ගැනීමේ සූදානමක් ඇතැයි සමාජ මාධ්‍ය හරහා හුවමාරු වන සටහන් කිහිපයක් FactSeeker හට නිරික්ෂණය විය.
එමෙන්ම ඒ සඳහා අවශ්‍ය කටයුතු සඳහා තායිලන්ත රජයේ ප්‍රධානීන් මෙරටට පැමිණීමට නියමිත බව ද එම සටහන්වල සඳහන් වී තිබිණි.
මේ සම්බන්ධයෙන් සමාජ මාධ්‍ය පරිශීලකයන් විවිධ ආකාරයේ අදහස් දක්වා තිබූ බැවින් FactSeeker එහි සත්‍ය අසත්‍යතාව සොයා බැලීය.

මෙරටට හිමිවි ඇති සංස්කාතික සම්පතක් ලෙස සලකා මේ වන තෙක් රජයේ මුදලින් නඩත්තු වුණු මෙම ඇතුන් දෙදෙනා වෙනුවෙන් මෙරට රජය, තායි රජයට පිළිතුරු ලබාදිය යුතු බවට එම සමාජ මාධ්‍ය සටහන් වල වැඩිදුරටත් දක්වා ඇත.
මේ සම්බන්ධයෙන් FactSeeker කරුණු පරීක්ෂා කිරීමේදී ප්‍රධාන ධාරාවේ මාධ්‍ය සහ වෙබ් අඩවි පරීක්ෂා ක‍ළේ ය. එහිදී මාධ්‍ය වාර්තා කර තිබුණේ, සිය රජයේ එවැනි සූදානමක් නැති බව තායිලන්ත තානාපති පයිතූන් මහාපන්නපෝන් මහතා මල්වතු පාර්ශවයේ මහනායක තිබ්බටුවාවේ ශ්‍රී සුමංගල නායක හිමියන්ට ප්‍රකාශ කර ඇති බවයි.

https://mawbima.lk/2025/10/27/%E0%B6%AD%E0%B7%8F%E0%B6%BA%E0%B7%92-%E0%B6%BB%E0%B7%8F%E0%B6%A2%E0%B7%8F-%E0%B7%83%E0%B7%84-%E0%B6%9A%E0%B6%AB%E0%B7%8A%E0%B6%A9%E0%B7%94%E0%B6%BD-%E0%B6%86%E0%B6%B4%E0%B7%83%E0%B7%94-%E0%B6%9C/
මල්වතු මහා විහාරයේ කඨින චීවර පූජාව ඉකුත් 25 වෙනි දින පැවැති අතර ඒ සඳහා තායිලන්ත තානාපතිවරයා ද සහභාගී වී තිබේ. එහිදී මෙම ඇතුන් දෙපළ නැවත තායිලන්ත රජයට පවරා ගැනීමේ සූදානමක් ඇත්දැයි මහ නායක හිමියන් තානාපතිවරයාගෙන් විමසා ඇති අතර එහිදී තානාපතිවරයා මේ බව ප්‍රකාශ කර ඇත.

මේ සම්බන්ධයෙන් අප ශ්‍රී දළදා මාලිගායේ ඇත්පන්තිය භාර නිලධාරී ප්‍රදීප් මියනපලාවගෙන් කළ විමසීමේදී ඔහු ප්‍රකාශ කළේ, එවැනි නිලධාරීන් කණ්ඩාමක් පැමිණෙන බව හෝ ඇත් දෙපළ නැවත පවරා ගන්නා බවට තායිලන්ත රජය දැනුම් දීමක් කර නැති බවයි. එමෙන්ම මෙම ඇතුන් දෙපළ යහපත් සෞඛ්‍ය තත්ත්වයෙන් පසුවන බව ද ඔහු සඳහන් කළේ ය.
ඒ අනුව තායිලන්ත රජයෙන් මෙරටට පරිත්‍යාග ලෙසින් ලැබුණු තායි රාජා සහ කැලණි කණ්ඩුල යන ඇතුන් දෙදෙනා නැවත තායිලන්තයට ගෙනයාමට එරට රජය අවධානය යොමුකර ඇති බවට සමාජ මාධ්‍ය ඔස්සේ පළවන පුවත් අසත්‍ය බව FactSeeker තහවුරු කරයි.