මෙය ජාතික ජන බලවේගයේ ලිපි ශීර්ෂය සහිතව එහි නායක අනුර කුමාර දිසානායකගේ අත්සනින් යුතුව යොමු කළ ලිපියක් උපුටා දක්වමින් සිරස රූපවාහිනී නාලිකාවේ ප්‍රවෘත්ති විකාශයේ පළ කළ ප්‍රවෘත්තියක් ලෙස හුවා දක්වමින් මෙම පෝස්ටුව හුවමාරු කර ගෙන තිබිණි.

“සංඝ සමුළුවක් පැවැත්වුව පලියට අප ජාතිවාදීන් හෝ ආගම්වාදීන් නොවේ. මාලිමා රජයකදී කිසිදු ආගමකට ප්‍රමුඛත්වය නොලැබෙන අතර අපගේ ප්‍රතිපත්තිවල කිසිදු වෙනසක් නොමැත. අප පසුගාමී ජාතියක් බවට පත්වීමට ප්‍රධාන හේතුවක් ලෙස ආගම සලකන අතර රාජ්‍ය සහ ආගම දුරස්ව තබා ගැනීම අපගේ ප්‍රධාන ප්‍රතිපත්තිය වේ.” යනුවෙන් ඉහත කී ලිපියෙහි සදහන් කර ඇත.

මේ පිළිබඳව factseeker විසින් සොයා බැලු අතර එහිදී මුලින්ම සිරස newsfirst වෙබ් අඩවිය හෝ සමාජ මාධ්‍ය පිටු තුළ මෙම පුවත පළකර ඇත්දැයි සොයා බැලීය.

එහිදී තහවුරු වුයේ, එම වෙබ් අඩවියේ හෝ සමාජ මාධ්‍ය පිටුතුළ එය පළකර නොමැති බවයි.

එමෙන්ම මෙවැනි ලිපියක් අනුර කුමාර දිසානායක විසින් මාධ්‍ය ආයතන ප්‍රධානීන් වෙත යැවුවේ ද? යන්න පිළිබඳව Factseeker ජාතික ජන බලවේගයේ මාධ්‍ය ඒකකයෙන් කළ විමසීමේදී ඔවුන් සඳහන් කළේ, එවැනි ලිපියක් අනුර කුමාර දිසානායක විසින් යොමු නොකළ බව යි. මෙය ජනතාව නොමග යැවීම සඳහා නිර්මාණය කරමින් හුවමාරු කර ඇති ලිපියක් බව ද එම මාධ්‍ය ඒකකය වැඩිදුරටත් සදහන් කළේ ය.

මේ අතර ජාතික භික්ෂු පෙරමුණ සංවිධානය කළ සඟ සමුළුවක් පසුගිය 24 දා මහරගම තරුණ සේවා සභාවේදී පැවැත්විණි. එහිදී ජාතික ජන බලවේගයේ නායක අනුර කුමාර දිසානායක මේ සම්බන්ධයෙන් ප්‍රකාශයක් කර තිබිණි. ආණ්ඩුක්‍රම ව්‍යවස්ථාවේ නව වෙනි වගන්තියේ ඇති බෞද්ධාගමට ප්‍රමුඛස්ථානය දිය යුතුය යන වගන්තිය ජාතික ජන බලවේග ආණ්ඩුවක් යටතේ කිසිදු වෙනසක් නොකරන බව ඔහු එහිදී අවධාරණය කර තිබිණි.

ඒ අනුව “කිසිදු ආගමකට ප්‍රමුඛත්වය නැහැ.ආගම රාජ්‍යයෙන් වෙන් කරනවා.” යනුවෙන් සඳහන් කරමින් අනුර කුමාර දිසානායක හෝ ජාතික ජන බලවේගය මාධ්‍ය ආයතන ප්‍රධානීන්ට ලිපියක් යවා නැති බව Factseeker තහවුරු කරයි.