“කෝච්චිය පාර මැද නවත්වලා , කන්න ගන්න යන ලංකාවේ දුම්රිය රියදුරන් – ලෝකෙටම එකයි හොඳේ” යනුවෙන් සඳහන් කරමින් මෙම වීඩියෝව හුවමාරු කර ගෙන තිබිණි.

මෙහි සත්‍ය අසත්‍යතාව පිළිබදව Factseeker සොයා බැලීමේදී මෙය වයික්කාල දුම්රිය ස්ථානය අසල බවත් පුත්තලම – කොළඹ මාර්ගය හරස් කරමින් අදාළ  දුම්රියක් නවතා ඇති බවත් පැහැදිළි කර ගැනීමට හැකි විය.

අදාළ සිදුවීම පිළිබඳව සොයා බැලීමේදී දුම්රිය ස්ථානාධිපතිවරුන්ගේ සංගමය හරහා වයික්කාල දුම්රිය ස්ථානයෙන් මේ පිළිබඳව පැහැදිළි කර ගැනීමට හැකිවිය. ඒ අනුව ඔවුන් සඳහන් කළේ, මෙම විඩියෝව  වයික්කාල දුම්රිය ස්ථානයේ දුම්රිය නවත්වා ඇති අවස්ථාවක  එහි රිය සහායකවරයා අසළ පිහිටි වෙළෙද සැලකින් ආහාර ලබා ගන්නා වීඩියෝවක් බවයි.

වයික්කාල දුම්රිය ස්ථානය කුඩා වීම හේතුවීම සහ එම අවස්ථාවේ නවත්වනු ලබන මගී දුම්රිය වැඩි දිගකින් යුක්ත වීම හේතුවෙන් එහි එංජිම කොටස පුත්තලම – කොළඹ මාර්ගය මැදට වන්නට නවත්වනු ලබන බව ද එය නිතරම සිදුවන්නක් බව ද ඔවුන් සඳහන් කරන ලදී.

එම අවස්ථාවේ රිය සහායක විසින් දුම්රිය එංජිමෙන් බැස ගොස් අසළ වෙළෙදසැළකින් කෑම පාර්සලයක් මිලදී ගෙන යළි දුම්රිය එංජිමට ඇතුළු වෙනවාත් සමගම, දුම්රිය ධාවනය ආරම්භ වන ආකාරය අදාළ වීඩියෝවෙන් දැකගත හැකිය.

Factseeker මේ සම්බන්ධයෙන් දුම්රිය වැඩබලන සාමාන්‍යාධිකාරි එස්.එස්. මුදලිගේගෙන් කළ විමසීමකදී ඔහු පැවැසැසුවේ, වයික්කාල දුම්රිය ස්ථානය ඉතා කුඩා දුම්රිය ස්ථානයක් බැවින් දුම්රිය නතර කිරීමේදී එහි එන්ජිම ප්‍රධාන මාර්ගය දක්වා ඇදී යා යුතු බව යි. දුම්රිය මගීන් බැස යාමට සහ නැග ගැනීමට යම් කිසි කාලයක් ගත වන බැවින් ඒ අවස්ථාවේ අසල කඩයකින් ආහාර පාර්සලයක් රැගෙන ඒමට කාලය පවතින බවද හෙතෙම පැවැසීය. අහිංසක මනුෂ්‍යයෙකු බත් වේලක් ගන්නා දර්ශනයක් මේ තරම් කතාබහට ලක් වීම ඉතා කණගාටු බව ද ඒ මහතා වැඩිදුරටත් පැවැසීය.

මේ සම්බන්ධයෙන් පුත්තලම දුම්රිය මාර්ගයේ ගමන් ගන්නා දුම්රිය මගියෙක්ගේ අදහස් ලබාගැනීමට හැකිවු අතර චන්දන පෙරේරා වන ඔහු පැවසුවේ,“ උදේ හවස යන එන පාරේ අපි නිතරම දකිනවා වයික්කාල ස්ටේෂන් එකේ දුම්රිය නවතද්දි වෙන්නේ මොකද්ද කියලා. නමුත් මේක වැරදියට වටහාගෙන තියෙන්නේ. මොකුත් හොයලා බලන්නේ තැනිව ෆේස්බුක් එකේ බැනගෙන යනවා. ඒක වැරදියි” යනුවෙනි.

කෙසේ වෙතත් මේ සම්බන්ධයෙන් Google map සහ google street view ආධාරයෙන්ද සොයා බැලු අතර එහිදි දුම්රිය ස්ථාන සහ ප්‍රධාන මාර්ගය අතර දුර ප්‍රමාණය ඉතා අඩු මට්ටමක පවතින බව පැහැදිලි විය.