ආසියානු කාන්තා ක්‍රිකට් ජයග්‍රහණය ශ්‍රී ලංකාව හිමි කර ගැනීමෙන් පසුව කාන්තා ක්‍රිකට් කණ්ඩායමේ සාමාජිකාවන් පිළිබඳ වැඩි වශයෙන් කතාබහක් ඇති වී තිබෙන බැවින් මේ පිළිබඳව සත්‍ය අසත්‍යතාවය සොයා බැලීමට factseeker කටයුතු කළේය.

ප්‍රධාන ධාරාවේ මාධ්‍යවල මේ සම්බන්ධයෙන් වාර්තා කර ඇත් ද? යන්න පිළිබදව Factseeker සොයා බැලූ අතර ඉකුත් අගෝස්තු 04 වෙනි ඉරිදා දිවයින පුවත්පත ද මේ පිළිබද වාර්තා කර තිබිණි. “ක්‍රිකට් ගහලා කප් දිනලා පාරේ බස් එකේ ගිය උදේශිකා” එහි ප්‍රධාන ශීර්ෂ පාඨය වූ අතර “තාත්තා මුළු බර ඇද්දේ කුරුදු තලලා” යනුවෙන් උප ශීර්ෂ පාඨයක් ද තිබිණි.

උදේශිකා ප්‍රබෝධිනි උපන් ගමේ ඇය පිළිගැනීම සදහා උත්සවයක් සංවිධානය කර තිබිණි. එය සංවිධානය කළ උදේශිකාගේ පවුලේ සමීපතමයෙකු වූ චන්දික දිනේෂ්ගෙන් අපි මේ පිළිබද විමසීමක් කළෙමු.

එහිදී ඔහු පැවසුවේ, “උදේශිකා ප්‍රබෝධිනි අපි කියන්නේ සුද්දි අක්කා කියලා. මේ පිළිගැනිමේ වැඩසටහන මගේ අදහසක් ඒක සංවිධානය කරේ මම ඇතුළු දියපිටගල්ලන ප්‍රශක්ති තාරුණ්‍යය විසින්.

උදේශිකා අක්කගේ ගෙදර වාහන දෙකක් තියෙනවා. ඔය කියනවා වගේ දෙයක් මෙතන උනේ නෑ. එයා වාහන ඩ්‍රයිව් කරන්නේ නෑ. ඒ නිසා වාහන තියෙන්නේ ගෙදර එයාගේ මල්ලි යවලා ගෙන්න ගත්තා නම් අපේ වැඩේට එයා කැමති වෙන්නේ නෑ. ඒ නිසා හයි වේ බස් එකේ ගෙදර එන්න කියලා එයාට නොදැනි අපි වැඩේ කළේ. දුප්පත්කම කියන්නේ වෙන එකක් සරල කම තවත් එකක්” යනුවෙන් චන්දික දිනේෂ් ප්‍රකාශ කළේ ය.

පිළිගැනීමේ උත්සවය ඉතා සාර්ථකව පැවැත්වු බව සදහන් කළ ඔහු, උදේශිකා ප්‍රබෝධිනී සම්බන්ධයෙන් පළවන තොරතුරු අසත්‍ය බව සමාජ මාධ්‍ය සටහනක් තබා තිබිණි.

ඒ අනුව ශ්‍රී ලංකා කාන්තා ක්‍රිකට් කණ්ඩායමේ ප්‍රධාන වේගපන්දු යවන්නිය උදේශිකා ප්‍රබෝධනි සම්බන්ධයෙන් සමාජ මාධ්‍යයේ හුවමාරු වන ‌තොරතුරු සත්‍ය නොවන බව factseeker තහවුරු කරයි.