මෙම ප්‍රචාරණ පෝස්ටුවල දැක්වෙන පරිදි ශ්‍රී ලංකාවේ ප්‍රධාන පෙළේ බැංකු සහ වෙළඳනාම සමග එක් වෙමින් කම්කරු අමාත්‍යාංශයේ බඳවා ගැනීමේ වේදිකාව යටතේ පුද්ගලයින්ට නිවසේ සිට කළ හැකි අර්ධකාලීන රැකියා ලබාදෙන බවත් ඒ සඳහා විවිධ ප්‍රමාණයන්ගේ වැටුප් ගෙවන බවත් සඳහන් කර තිබේ.

මෙම අනුග්‍රාහක ප්‍රචාරණ පළ කරන ලද ෆේස්බුක් ගිණුම් පරීක්ෂා කර බැලීමේදී ඒවා කිසිවක් ශ්‍රී ලංකාවේ පුද්ගල ගිණුම් නොවන බවත්, විදෙස් පුද්ගලයින්ගේ දත්ත ඇතුළත් ගිණුම් බවත් නිරීක්ෂණය විය. ඒ අනුව මෙම ප්‍රචාරණ දැන්වීම් සත්‍ය නොවන බවට කරුණු තහවුරු කළ හැකිය.

එසේම, එම පළ කිරීම්වල පහළින් සඳහන් Apply Now මත ක්ලික් කිරීමෙන් පුද්ගලයින්ගේ පෞද්ගලික තොරතුරු ඉල්ලා සිටියි. ඒ අනුව මෙම පළ කිරීම් පුද්ගලයින්ගේ පෞද්ගලික දත්ත ලබා ගැනීම සඳහා දියත් කරන ලද ස්කෑම් වංචනික උපක්‍රමයක් විය හැක.

නමුත් මේ පිළිබඳ වැඩිදුර කරුණු නිරීක්ෂණය කිරීමේදී එම ප්‍රචාරණ පෝස්ටුවලට ඇතැම් පුද්ගලයින් විසින් උනන්දුවක් දක්වන බව පෙනී යයි. ඒ ඔවුන් මේ පිළීබඳ වැඩිදුර තොරතුරු ඉල්ලා සිටින ආකාරය අනුව ඒ බව පැහැදිලි වෙයි.

මේ හේතුවෙන් අදාළ ප්‍රචාරණ දැන්වීම් සම්බන්ධයෙන් කම්කරු අමාත්‍යාංශයෙන් අප කළ විමසීමකදී අනාවරණය වූයේ, කිසිදු ආකාරයක වෙළඳ නාම හෝ බැංකු සමඟ එක්ව රැකියා ලබාදෙන බවට ප්‍රචාරණ ක්‍රියාවලියක් එම අමාත්‍යාංශය යටතේ නොකරන බවයි.

එසේම කම්කරු අමාත්‍යංශයේ වෙබ් අඩවිය තුළද වෙනත් රැකියා පිළිබඳ තොරතුරු ඉදිරිපත් කර තිබුණ ද මේ ආකාරයේ අර්ධකාලීන රැකියා ලබාදීම් පිළිබඳ කිසිදු විස්තරයක් සඳහන් නොවුණි.

මේ අනුව කම්කරු අමාත්‍යාංශය, ශ්‍රී ලංකාවේ බැංකු සහ වෙළඳ ජාලයන් සමග එක්ව අර්ධකාලින රැකියා ලබා දෙන බවට පළ වන ප්‍රචාරණ අසත්‍ය බව FactSeeker තහවුරු කරයි.

මෙම අසත්‍ය ප්‍රචාරණයන් හරහා පුද්ගලයින්ගේ පෞද්ගලික දත්ත ලබා ගැනීම සඳහා කරන වංචනික උපක්‍රමයක් විය හැකි බව FactSeeker අවධාරණය කරයි.