ජනාධිපති රනිල් වික්‍රමසිංහ මහතා විසින් මුදල් අමාත්‍යවරයා ලෙස 2024 වසර සඳහා වන අයවැය ඊයේ (13) පාර්ලිමේන්තුවට ඉදිරිපත් කරන ලදී.

මේ අතර, උතුරු නැගෙනහිර පළාත්වල නැවත පදිංචි කිරීම් සඳහා රජය විසින් වෙන් කර ඇති මුදල් පිළිබඳව සමාජ මාධ්‍ය ඔස්සේ පරස්පර විරෝධී දත්ත කිහිපයක් නිරීක්ෂණය කිරීමට factseekerට හැකි විය.

විශේෂයෙන්ම “ඉතිහාසයේ ප්‍රථම වතාවට උතුරු නැගෙනහිරට වැඩි ප්‍රතිපාදන වෙන් කෙරේ. උතුරු නැගෙනහිර පළාත් නැවත පදිංචි කිරීමට රුපියල් බිලියන 2000ක් වෙන් කෙරේ: මුදල් ඇමති, ජනාධිපති රනිල් වික්‍රමසිංහ” යනුවෙන් ට්විටර් සටහනක් තැබූ අයුරු දක්නට ලැබිණි.

මේ සම්බන්ධයෙන් වීරකේසරි වෙබ් අඩවිය සහ එහි නිල ට්විටර් පිටුව උතුරු සහ නැගෙනහිර පළාත් නැවත පදිංචි කිරීම සඳහා රුපියල් බිලියන 2,000ක් වෙන් කර ඇති බව සදහන් කර තිබිණි.

එමෙන්ම Battinews වෙබ් අඩවිය ද මෙම ප්‍රවෘත්තිය පළ කර තිබුණේ උතුරු නැගෙනහිරට රුපියල් බිලියන 2000 ක් වෙන් කර ඇති බව ය.http://(http://www.battinews.com/)

කෙසේ වෙතත් මේ පිළිබඳව factseeker සොයා බැලීමේදී පෙනී ගියේ මුදල් වෙන්කිරීම සම්බන්ධයෙන් මාධ්‍යවල පළ වූ ප්‍රවෘත්තිවල වැරදි ඇති බවයි.

මුදල් අමාත්‍යාංශය විසින් ප්‍රකාශයට පත් කරන ලද 2024 වසර සඳහා වන නිල අයවැය ප්‍රකාශනයේ උතුරු සහ නැගෙනහිර පළාත් නැවත පදිංචි කිරීම සඳහා රජය බිලියන 2.0 (රුපියල් මිලියන දෙදහසක්) වෙන් කර ඇති බව Factseeker තහවුරු කරයි.