මෙම ප්‍රහාරයෙන් පසු මේ වන විට ද යුද ආතතිය පවතින අතර ඒ පිළිබඳ පුවත් සහ වීඩියෝ සමාජ මාධ්‍ය ඔස්සේ හුවමාරු වෙමින් පවතී.

මෙම ප්‍රහාරය පිළිබඳ තහවුරු කරන ලද ප්‍රවෘත්ති සහ වීඩියෝ මාධ්‍ය මගින් ප්‍රසිද්ධියට පත් වුවද, අසත්‍ය ප්‍රවෘත්ති, නොමඟ යවන වීඩියෝ සහ ඡායාරූප හුවමාරු වන බව factseeker නිරීක්ෂණය කළේ ය.

මෙහිදී වැඩි වශයෙන් හුවමාරු වූ වීඩියෝ සහ ඡායාරූප කිහිපයක් හඳුනාගෙන පැහැදිළි කිරීමට Factseeker උත්සාහයක යෙදුනි.

විශේෂයෙන්ම ඉරානය ඊශ්‍රායලයට මිසයිල ප්‍රහාරයක් එල්ල කිරීමෙන් පසු පලස්තීනයේ අල්-අක්සා පල්ලිය ඉදිරිපිට පලස්තීන ජනතාව සමරන වීඩියෝවක් සමාජ මාධ්‍ය ඔස්සේ විශේෂයෙන්ම X අඩවියේ හුවමාරු වෙමින් පැවතිනි.

එම වීඩියෝව මෙතැනින් – https://www.youtube.com/watch?v=LdFMTm1QcNM

පසුගිය 14 වැනිදා ඉරානය – ඊශ්‍රායලයට ඩ්‍රෝන් මිසයිල ප්‍රහාරයක් එල්ල වූ එදින රාත්‍රියේ සිදුවූ සිදුවීමක් ලෙස මෙය බෙදා හැරියත් මේ හුවමාරු වන පුවතේ කිසිදු සත්‍යතාවක් නැත.

පලස්තීන ජනතාව අල්-අක්සා මුස්ලිම් පල්ලිය ඉදිරිපිට පසුගිය 05 වෙනිදා රැස්වී  උත්සවයක් පැවැත්වූ අවස්ථාවේදී මෙය සිදුව ඇති බව බොහෝ දෙනෙකු මෙම වීඩියෝව හුවමාරු කර ගෙන ඇත.

එම වීඩියෝව මෙතැනින් – https://www.youtube.com/watch?v=YMTvAZM-Hls

එසේම, යේමනයේ සිට ඊශ්‍රායලයට මිසයිල දියත් කළ බව කියන වීඩියෝවක් ද සමාජ මාධ්‍යවල වේගයෙන් හුවමාරු වෙමින් පවතී. කෙසේ වෙතත් මෙම වීඩියෝව ඊශ්‍රායලයට එල්ල වූ ප්‍රහාරයේදී ගත් වීඩියෝවක් නොවන අතර මෙය 2015 දෙසැම්බර් 15 වැනිදා සමාජ මාධ්‍යවල පළවූ වීඩියෝවකි.

එමෙන්ම ඊශ්‍රායලයට ඩ්‍රෝන් මිසයිල ප්‍රහාර එල්ල කරන බව කියන ඡායාරූපයක් ද මේ වන විට වැඩි වශයෙන් හුවමාරු වෙමින් පවතී. කෙසේ වෙතත් මෙම ඡායාරූපය AI තාක්ෂණය යොදාගෙන නිර්මාණය කර ඇති ඡායාරූපයකි.

අසත්‍ය ප්‍රවෘත්ති, ව්‍යාජ ඡායාරූප සහ වීඩියෝ සමාජයට විශාල බලපෑමක් ඇති කරන බව Factseeker  දිගින් දිගටම අවධාරණය කරන අතර, ඉරාන-ඊශ්‍රායල් ප්‍රහාරයේදී පවා AI තාක්‍ෂණය හරහා නිර්මාණය කරන ලද ව්‍යාජ වීඩියෝ, වැරදි ලෙස බෙදාගත් වීඩියෝ සහ ඡායාරූප සමාජය ග්‍රහනය කර ගන්නා බව Factseeker  තහවුරු කර තිබේ.