ඉරානයේ න්‍යෂ්ටික මර්මස්ථාන සහ හමුදා ප්‍රධානීන් ඉලක්ක කර ඊශ්‍රායල ආරක්ෂක බලකාය (IDF) විසින් පසුගිය 13 වනදා මිසයිල ප්‍රහාර එල්ල කළේ ය. මෙම ප්‍රහාරයට ප්‍රතිචාර ලෙස ඉරානය විසින් ඊශ්‍රායලයේ හමුදා මධ්‍යස්ථාන සහ ගුවන් කඳවුරු ඉලක්ක කර බැලස්ටික් මිසයිල ප්‍රහාර එල්ල කර කර ඇත.

යුධ ක්‍රියා උත්සන්න වීම සමග සමාජ මාධ්‍ය ඔස්සේ එම ගැටුම්වල ඡායාරූප සහ වීඩියෝ දර්ශන සංසරණය වෙමින් පවතී. එසේ ශ්‍රී ලංකාව තුළ සංසරණය වන දර්ශන සම්බන්ධයෙන් FactSeeker අවධානයෙන් පසුවන අතරතුර, අද දෙරණ සිංහල, X ගිණුමේ පළ කළ වීඩියෝවක් වෙත අපගේ විශේෂ අවධානය යොමු විය.

එය මෙතැනින් – https://x.com/adaderanasin/status/1933344491886555502

ඊශ්‍රායලය විසින් ඉරානය වෙත එල්ල කරන ලද ගුවන් ප්‍රහාර බව දක්වමින්, X සමාජ මාධ්‍ය ගිණුම්වල පළ කර ඇති වීඩීයෝ දර්ශන කිහිපයක් එකට එක් කර එම වීඩියෝව සකස් කර තිබිණි.

එහි ඇතුළත් එක් එක් දර්ශන රූප මූලාශ්‍ර සෙවුම් මෙවලම් යොදාගෙන පරීක්ෂා කිරීමේදී එහි පළමු තත්පර 16 හි ඇතුළත් වීඩියෝව පසුගිය 13 වනදා ඉරානයට එල්ල කළ ප්‍රහාරයට අදාළ දර්ශනයක් නොවන බව FactSeeker අනාවරණය කර ගත්තේය.

එම වීඩියෝව, 2025 මැයි මාසයේදී ඉන්දියාව විසින් පකිස්තානයේ ත්‍රස්තවාදී ඉලක්ක වෙත එල්ල කරන ලද ප්‍රහාරයේ දර්ශන ලෙස මෙන්ම, 2024 වසරේ ඔක්තෝම්බර් මාසයේදී ඉරානය විසින් ඊශ්‍රායලය වෙත එල්ල කරන ලද මිසයිල ප්‍රහාරයේ දර්ශන ලෙස ද විවිධ සමාජ මාධ්‍ය ගිණුම් හරහා පළ කර ඇති අන්දම FactSeeker නිරීක්ෂණය කළේය.

ඒ පිළිබඳව පරීක්ෂා කිරීමේදී අදාළ වීඩියෝ දර්ශනය සම්බන්ධයෙන් ප්‍රංශ පුවත් ඒජන්සියේ (AFP Middle East & North Africa) කරුණු පරීක්ෂා කිරීමේ අංශය සිදු කළ තත්කාලීන කරුණු විමර්ශනයක් අපට නිරීක්ෂණය විය.

එය මෙතැනින් – https://factcheckarabic.afp.com/doc.afp.com.44XY4CP සහ මෙතැනින්.https://factcheck.afp.com/doc.afp.com.44WM2T3

එමගින් කරුණු පරීක්ෂා කර තහවුරු කර තිබුණේ, එම තත්පර 16 ක වීඩියෝව 2024 ඔක්තෝබර් මස 1 වැනි දින ඉරානය විසින් ඊශ්‍රායලය වෙත එල්ල කරන ලද ප්‍රහාරයකට අදාළ දර්ශන වන බවයි.

ඒ අනුව, අද දෙරණ සිංහල X ගිණුමේ ඊශ්‍රායලය විසින් ඉරානය වෙත පසුගිය 13 වනදා එල්ල කරන ලද ගුවන් ප්‍රහාර බව දක්වමින් පළ කර ඇති වීඩියෝවේ ඇතුළත් පළමු දර්ශනය නොමගයවනසුලු බව FactSeeker කරුණු පරීක්ෂා කර තහවුරු කරයි.