“න්‍යාය පත්‍රයක කොටසක් ලෙස තමන් කණ්ඩායමෙන් නෙරපා දැමූ ආකාරය විස්තර කෙරෙන ‘ඇජෙන්ඩා’ නම් පොත එළිදැක්වේ.” යනුවෙන් සඳහන් කරමින් පොස්ට් හුවමාරු වන අතර එම පොස්ට් තුළ ඇති පොතක ඡායාරූපයේ ඇන්ජලෝ මැතිව්ස්ගේ රුව ඇතුළත් කර තිබේ.

එමෙන්ම “කණ්ඩායමෙන් මා නෙරපීමේ ඇජනේඩා ඇන්ජලෝ මැතිව්ස් – පෙරවදන රෙක්ස් ක්ලෙමෙන්ටයින්“ යනුවෙන් එහි සඳහන් කර තිබේ.

මෙවැනි පොතක් ඇන්ජලෝ මැතිව්ස් විසින් ප්‍රකාශයට පත්කර ඇතිදැයි ඔහුගේ නිල සමාජ මාධ්‍ය ගිණුම් පරීක්ෂා කර සොයා බැලු අතර ඒ තුළ ඔහු එවැන්නක් සඳහන් කර නොමැති බව නිරීක්ෂණය විය.

හිටපු ජනාධිපති ගෝඨාභය රාජපක්ෂ මහතා විසින් ආසන්න දිනයකදී “ජනාධිපති ධූරයෙන් මා නෙරපීමේ කුමන්ත්‍රණය‘ නමින් ග්‍රන්ථයක් ප්‍රකාශයට පත්කළ අතර මෙම පොස්ටුවේ ඇති ඡායාරූපය ද එම පොතට බෙහෙවින් සමාන බව Search any image with Google Lens හරහා සොයාබැලීමේදී ද අනාවරණය විය.

මේ සම්බන්ධයෙන් Fact seeker ඇන්ජලෝ මැතිව්ස්ගේ කළමනාකරුගෙන් කළ විමසීමකදී ඔහු සඳහන් කළේ, ඇන්ජලෝ මැතිව්ස් එවැනි කෘතියක් ප්‍රකාශයට පත්කර නොමැති බවයි.

ඒ අනුව “කණ්ඩායමෙන් මා නෙරපීමේ ඇජනේඩා ඇන්ජලෝ මැතිව්ස් – පෙරවදන රෙක්ස් ක්ලෙමෙන්ටයින්“ යනුවෙන් හුවමාරුවන සමාජ මාධ්‍ය පෝස්ටු සංස්කරණය කරන ලද පෝස්ටුවක් බව factseeker තහවුරු කරයි.