FactSeeker මෙහි සත්‍ය අසත්‍යතාව පරීක්ෂා කළේය.

2024.10.11 සිකුරාදා දින අරුණ පුවත්පත වාර්තා කළ එම පුවත මෙසේය.

“සහකාර පොලිස් අධිකාරිවරයකුට ඔහුගේ ගමට පත්වීමක් දීමේ අරමුණෙන් අනුරාධපුර කොට්ඨාසය භාර පොලිස් අධිකාරිවරයා මන්නාරමට මාරු කර යැවීමේ සිද්ධියට ආණ්ඩුවේ දේශපාලනඥයකු මැදිහත් වී ඇතැයි පොලිස් ආරංචි මාර්ග සඳහන් කරයි.

වැඩබලන පොලිස්පති ප්‍රියන්ත වීරසූරිය විසින් ජාතික පොලිස් කොමිෂන් සභාවට දුන් නිර්දේශ මත එම ස්ථාන මාරුව ක්‍රියාත්මක වී තිබේ.

පොලිස් අධිකාරි ආර්. එස්. ධර්මදාස අනුරාධපුර කොට්ඨාසයේ සිට මන්නාරම කොට්ඨාසයටත්, සහකාර පොලිස් අධිකාරි පී. එල්. විතාන මන්නාරමේ සිට අනුරාධපුරයටත් මාරු කර ඇත.

ඊට අමතරව පොලිස් අධිකාරි එම්. ගුණවර්ධන මහනුවර කොට්ඨාසයේ සිට ගම්පොළ කොට්ඨාසය වෙතත්, සහකාර පොලිස් අධිකාරි සී. ඒ. පුල්වංශ හලාවත කොට්ඨාසයටත් මාරු කර තිබේ.

පොලිස් නිලධාරියකු විශ්‍රාම ගැනීමට වසර දෙකක් තිබියදී තමන් පදිංචි ප්‍රදේශයට පැමිණීමට අවසර ඇතත් මෙම පත්වීම රජයේ දේශපාලන ප්‍රබලයකුගේ ඉල්ලීම මත කර ඇතැයි පොලිස් ආරංචි මාර්ග තවදුරටත් සඳහන් කළේය.”

මේ පිළිබඳව FactSeeker පොලිස් මාධ්‍ය ප්‍රකාශක, නියෝජ්‍ය පොලිස්පති, නීතීඥ නිහාල් තල්දූවගෙන් විමසීමක් කළේ ය. එහිදී ඔහු සඳහන් කළේ, මෙම ස්ථාන මාරුවීම් මීට මාස කිහිපයකට පෙර අනුමත කර තිබූ ස්ථාන මාරුවීම් බවයි. මැතිවරණ සමයක් පැවති නිසාත් එම ස්ථාන මාරුවීම් පිළිබඳ පණිවිඩ යැවීම මැතිවරණ කොමිසමේ අනුමැතිය මත සිදු කළ යුතු වන නිසාත්  මෙම පණිවිඩ යැවීම ප්‍රමාද වූ බව ඔහු සඳහන් කළේය. වත්මන් ආණ්ඩුව බලයට පත්වීමට පෙර මීට අදාළ අනුමැතිය ලැබී තිබූ බව ඔහු වැඩිදුරටත් පැවැසීය.

මේ පිළිබඳව FactSeeker ජාතික පොලිස් කොමිසමෙන් විමසීමක් කළේය. එහිදී අදාළ ස්ථාන මාරු සම්බන්ධයෙන් වත්මන් වැඩබලන පොලිස්පතිවරයාගේ කිසිදු සම්බන්ධයක් නොමැති බවත් ඊට අදාළ නිර්දේශ ලබාදී ඇත්තේ එවකට ජ්‍යේෂ්ඨ නියෝජ්‍ය පොලිස්පති (පරිපාලන) ලලිත් පතිනායක බවත් එහිදී ජාතික පොලිස් කොමිසම අනාවරණය කළේ ය.

2024 ජනාධිපතිවරණය ප්‍රකාශයට පත් කිරීමට අදාළ ගැසට් නිවේදනය 2024.07.26 දින මැතිවරණ කොමිෂන් සභාව නිවේදනය කළේය. එදින සිට ජනාධිපතිවරණ කාලසීමාව ආරම්භ විය. මැතිවරණ සමයකදී රාජ්‍ය සේවයේ ඇතැම් පත්වීම්, උසස්වීම්, මාරුවීම් සම්බන්ධ අනුමැතිය ලබාගැනීම සඳහා මැතිවරණ කොමිෂන් සභාව වෙත යොමු කිරීම පවතින ක්‍රියා පටිපාටිය වෙයි.

Factseeker මේ සම්බන්ධයෙන් ජාතික පොලිස් කොමිසමෙන් විමසීමක් කළෙමු. 2024.07.26 දින අදාළ පොලිස් අධිකාරීවරුන්ගේ සහ සහකාර පොලිස් අධිකාරීවරුන්ගේ ස්ථාන මාරුවීම්වලට අනුමැතිය ලබාගැනීම සඳහා මැතිවරණ කොමිෂන් සභාව වෙත යොමු කළ බව ජාතික පොලිස් කොමිසම එහිදී ප්‍රකාශ කළේය.

ඉකුත් 15 වෙනි දින පැවැත්වූ කැබිනට් තීරණ දැනුම්දීමේ මාධ්‍ය හමුවේදී කැබිනට් ප්‍රකාශක, අමාත්‍ය විජිත හේරත් මේ පිළිබඳව අදහස් දක්වමින් සඳහන් කළේ, මෙම ස්ථාන මාරුවීම් වත්මන් රජය බලයට පත්වීමට පෙර සිදු වූවක් බවයි.

එදින කැබිනට් තීරණ දැනුම් දීමේ මාධ්‍ය හමුවට සහභාගී වූ පොලිස් මාධ්‍ය ප්‍රකාශක, නියෝජ්‍ය පොලිස්පති, නීතීඥ නිහාල් තල්දූව සඳහන් කළේ, මෙම ස්ථාන මාරුවීම් මාස ගණනාවකට පෙර සිදු කරනු ලැබූ බවත් මැතිවරණය සමයක් වූ බැවින් ඊට අදාළ පණිවිඩ යැවීම මැතිවරණ කොමිෂන් සභාවේ අනුමැතිය සහිතව මෑතකදී සිදු කිරීමට කටයුතු කර ඇති බවත්ය.

ඒ අනුව මෙම පොලිස් ස්ථාන මාරුවීම් සිදුවීම වත්මන් රජය බලයට පැමිණීමට පෙර සිදු වී ඇති අතර, එය “ආණ්ඩුවේ මැදිහත්වීමකින්” සිදු වූ බව දැක්වෙන මාධ්‍ය වාර්තා නොමග යැවීම සඳහා පළ කළ පුවත් බව ද FactSeeker තහවුරු කරයි.

එමෙන්ම, මෙම ස්ථාන මාරුවීම් වත්මන් වැඩබලන පොලිස්පතිවරයාගේ නිර්දේශ මත ක්‍රියාත්මක වී තිබෙන බවට දැක්වෙන වාර්තා ද අසත්‍ය බව FactSeeker තහවුරු කරයි.