පාර්ලිමේන්තුවේ හිටපු මහලේකම් “ධම්මික දසනායක” ආණ්ඩුක්‍රම ව්‍යවස්ථා සභාවේ ලේකම් ධුරයෙන් එළැඹෙන 15 වනදා සිට ඉල්ලා අස්වන බවට ප්‍රධාන ධාරාවේ මාධ්‍ය බොහොමයක් 2025 – 05 – 10 දින පුවත් පළ කර තිබිණි. එම පුවත් මෙතැනින්, මෙතැනින් සහ මෙතැනින්.

කෙසේ වෙතත් දිවයින පුවත්පතේ වෙබ් අඩවියේ දැක්වුණේ එම තනතුරේ කටයුතු කළ “ධම්ම දිසානායක” ඉල්ලා අස්වී ඇති බවටයි.

ප්‍රජාතන්ත්‍රීය ප්‍රතිසංස්කරණ සහ මැතිවරණ අධ්‍යයන ආයතනයේ විධායක අධ්‍යක්ෂ මංජුල ගජනායක මෙම ප්‍රවෘත්තිය සිය ෆේස්බුක් පිටුවේ පෝස්ටුවක් පළ කරමින් මේ පිළිබඳව ප්‍රශ්න කර තිබෙන බව ද FactSeeker නිරීක්ෂණය කළේය.

මංජුල ගජනායක සිය පෝස්ටුව සමග එම පුවතේ ඡායාරූපයක්(screenshot) පළ කර තිබූ අතර එහි සිරස්තලයෙන් දැක්වුණේ, “ධම්ම දිසනායක ලේකම් ධුරය එපා කියයි” යනුවෙනි.

Google Reverse Image Search හරහා අප කළ පරීක්ෂාවේදී එවැනි පුවතක් දිවයින වෙබ් අඩවිය පළ කර ඇති බවට අපට නිරීක්ෂණය කළ හැකි වූ අතර මේ වන විට එය වෙබ් අඩවියෙන් ඉවත් කර ඇති බවට තහවුරු විය.

දිවයින වෙබ් අඩවිය 2025.05.12 වෙනි දින ඒ සඳහා නිවැරදි කිරීමක් සහිතව පුවතක් පළ කර තිබිණි. එයින් දැක්වුණේ 2025 – 05 – 10 දින පළ වූ පුවතේ ආණ්ඩුක්‍රම ව්‍යවස්ථා සභාවේ ලේකම්වරයා ලෙස කටයුතු කළ පාර්ලිමේන්තුවේ හිටපු මහලේකම් ධම්මික දසනායක යන නම වෙනුවට, ධම්ම දිසානායක යන නම සටහන් වී තිබූ බවත් එය ප්‍රමාද දෝෂයක් බවත්ය.

ඒ අනුව, 2025 – 05 – 15 දින සිට ආණ්ඩුක්‍රම ව්‍යවස්ථා සභාවේ ලේකම් ධුරයෙන් ඉල්ලා අස්වන බවට දැනුම්දී ඇත්තේ පාර්ලිමේන්තුවේ හිටපු මහලේකම් ධම්මික දසනායක බව FactSeeker සනාථ කරයි.