ඒ අනුව මෙහි සත්‍යාසත්‍යතාව පරීක්ෂා කිරීමට FactSeeker කටයුතු කළේය.

අශේන් සේනාරත්න කොළඹ දිස්ත්‍රික්කයේ ස්වාධීන කණ්ඩායමක් යටතේ ඉදිරිපත් කළ මුල්ම නාමයෝජනා පත්‍රය බලය නොමැති අයෙකු විසින් භාරදීම යන හේතුව මත ප්‍රතික්ෂේප විය.

ඉන් අනතුරුව ඔහු සිය නිල ෆේස්බුක් පිටුව හරහා ප්‍රචාරය කර තිබුණේ, කොළඹ දිස්ත්‍රික්කයෙන් යතුරු කැරැල්ල ලකුණින් තරග වදින ස්වාධීන කණ්ඩායම වෙත ඡන්දය ලබා දී ඔහුට පාර්ලිමේන්තුව නියෝජනය කිරීමට අවස්ථාව උදා කරන ලෙසයි.

https://www.facebook.com/share/r/1B6VApzctQ/

කොළඹ දිස්ත්‍රික්කයෙන් යතුරු කැරැල්ල ලකුණින් තරග කළේ, ස්වාධීන කණ්ඩායම් අංක 15 යි. එම ස්වාධීන කණ්ඩායමේ අපේක්ෂක ලැයිස්තුව තුළ අශේන් සේනාරත්නගේ නම ඇතුළත් වන්නේද යන්න අපි විමසා බැලුවෙමු.

එහි ඔහුගේ නම ඇතුළත් නොවන බව අපට තහවුරු විය.

ස්වාධීන කණ්ඩායම් අංක 15 කණ්ඩායම් නායක ලෙස ආචාර්ය සසිඳු මහානාම මහ මැතිවරණයට තරග කර තිබේ. ඔහුගේ නිල ෆේස්බුක් පිටුව පරීක්ෂා කිරීමේදී පහත Newsfirst පුවත් ආවරණය නිරීක්ෂණය විය.

https://www.facebook.com/share/r/12DkPXfXG4P/

එම මාධ්‍ය හමුව මගින් දැක්වුණේ අදාළ ස්වාධීන කණ්ඩායමේ ජාතික ලැයිස්තු මන්ත්‍රී ධුර අපේක්ෂකයෙකු ලෙස අශේන් සේනාරත්න ඇතුළත්ව සිටින බවයි.

ඒ අනුව ස්වාධීන කණ්ඩායම් අංක 15 මෙවර පාර්ලිමේන්තු මැතිවරණයේදී කොළඹ දිස්ත්‍රික්කයෙන් ලබාගත් ඡන්ද සංඛ්‍යාව පිළිබඳව අපි අවධානය යොමු කළෙමු.

කොළඹ දිස්ත්‍රික්කයේ අවසන් නිල ඡන්ද ප්‍රතිඵලය අනුව ස්වාධීන කණ්ඩායම් අංක 15 ඡන්ද 1792 ක් ලබාගෙන ඇත.

එම නිල ප්‍රතිඵලය මෙතැනින්

https://election.news.lk/parliamentary-election-2024/colombo/colombo-district-final

මෙම කණ්ඩායම කොළඹ දිස්ත්‍රික්කයෙන් ලබා ගෙන ඇති තැපැල් ඡන්ද සංඛ්‍යාව 08 කි.

එම නිල තැපැල් ඡන්ද ප්‍රතිඵලය මෙතැනින් – https://election.news.lk/parliamentary-election-2024/colombo/colombo-ds-postal-vote

ඒ අනුව අශේන් සේනාරත්න ජාතික ලැයිස්තුව නියෝජනය කළ යතුරු කැරැල්ල ලකුණින් තරග කළ ස්වාධීන කණ්ඩායම දිනාගත් ඡන්ද සංඛ්‍යාව 08 ක් බව දැක්වෙන සමාජ මාධ්‍ය සටහන් සාවද්‍ය බව FactSeeker තහවුරු කරයි.