දිවයින ඉරිදා සංග්‍රහය මෙම ප්‍රවෘත්තිය වාර්තා කර තිබුණේ, “කැබිනෙට්ටුව අදානිට දොර වසයි.” යනුවෙනි. මේ අතර සිලෝන් වයර් නිව්ස් වෙබ් අඩවිය එය වාර්තා කර තිබුණේ, ශ්‍රී ලංකාව විදුලි ගනුදෙනුව අවලංගු කළ බව වාර්තා කිරීමත් සමග අදානි කොටස් පහත වැටී ඇති බවය.

එම ප්‍රවෘත්තිය මෙතැනින් – https://www.ceylonwire.lk/adani-shares-fall/

මේ අනුව මේ සම්බන්ධයෙන් ජනමාධ්‍ය ඇමති, රජයේ කැබිනට් ප්‍රකාශක වෛද්‍ය නලින්ද ජයතිස්ස ද විශේෂ ප්‍රවෘත්ති සාකච්ඡාවකදී මේ සම්බන්ධයෙන් අදහස් දක්වා තිබේ.

මේ හේතුවෙන් අදානි සමාගමේ ඉදි කිරීමට යෝජිත සුළං විදුලි බලාගාර ව්‍යාපෘතිය වත්මන් ආණ්ඩුව අවලංගු කළේ ද? යන්න පිළිබඳ ව Factseeker විමසා බැලීය.

දිවයින ඉරිදා සංග්‍රහය මෙම වැඩිදුරටත් වාර්තා කර තිබුණේ, “මෙරටට අවාසි සහගත ලෙස සහ පරිසරයට හානිදායක වන අයුරින් ඉන්දියාවේ අදානි සමාගම විසින් මන්නාරම් ද්‍රෝනියේ ඉදි කිරීමට ගිය සුළං විදුලි බලාගාරය ඉදි නොකිරීමට කැබිනට් මණ්ඩල අනුමැතිය හිමි වී ඇති බවයි.”

පැතිර යන මෙම පුවත් සම්බන්ධයෙන් අදානි සමාගම නිවේදනයක් නිකුත් කර තිබිණි.

මන්නාරම සහ පුනරීන්හි ඉදිකිරීමට යෝජිත මෙගාවොට් 484 ක සුළං විදුලි ව්‍යපෘතිය රජය අවලංගු කර ඇති බව පැවසෙන මාධ්‍ය වාර්තා අසත්‍ය බව එම නිවේදනයේ සඳහන් කර ඇත.

අදාළ ව්‍යාපෘතිය 2024 මැයි මාසයේදී අනුමත කර ඇති අතර එහිදී එකඟතාවට පැමිණි ගාස්තු නැවත ඇගයීමට පසුගිය ජනවාරි 02 දා පැවැති කැබිනට් මණ්ඩලයේදී තීරණය කර ඇති බව එම නිවේදනයේ සඳහන් කර තිබිණි.

එම නිවේදනය මෙතැනින් – https://www.adani.com/en/Newsroom/Media-Release/media-statement-24-01-2025

අදානි සමාගම නිකුත් කළ නිවේදනය දිවයින පුවත්පත අද  (27) වාර්තා කර තිබුණි.

මේ සම්බන්ධයෙන් කැබිනට් ප්‍රකාශක, ඇමති නලින්ද ජයතිස්ස රජයේ ප්‍රවෘත්ති දෙපාර්තමේන්තුවේදී පැවැති විශේෂ ප්‍රවෘත්ති සාකච්ඡාවකදී සඳහන් කළේ, අදාළ සුළං විදුලි ව්‍යාපෘතිය අවලංගු කිරීමට රජය තීරණයක් ගෙන නැති බවය. මේ සම්බන්ධයෙන් අධිකරණයේ නඩු පහක් ගොනු කර ඇති අතර එම නඩු ඉදිරි මැයි මාසයේදී විභාගයට ගැනීමට නියමිත බව ද හෙතෙම සඳහන් කළේ ය.

මෙම ව්‍යාපෘතිය සම්බන්ධයෙන් නව රජය සමාලෝචයක් කිරීමට තීන්දු කළ අතර ඒ සඳහා කමිටුවක් ද පත් කළ බව නලින්ද ජයතිස්ස පැවැසීය.

එම වීඩියෝව මෙතැනින් – https://www.vishmithacloud.com/s-UoscfNrM

ඒ අනුව අදානි සමාගමේ මන්නාරම් හා පුනරීන් සුළං විදුලි ව්‍යාපෘතිය අවලංගු කළ බව පළවන මාධ්‍ය වාර්තා අසත්‍ය බව Factseeker තහවුරු කරයි.