විශ්‍රාමික ජනාධිපතිවරයෙකු වශයෙන් හිටපු ජනාධිපති ගෝඨාභය රාජපක්ෂ වෙනුවෙන් මසකට රුපියල් දහතුන් ලක්ෂ විසි නව දහස් තුන්සිය අසූ හතක (රුපියල් 13,29,387) මුදලක් රජයෙන් වියදම් කරන බව ජනාධිපති ලේකම් කාර්යාලය පවසයි.

හිටපු ජනාධිපති ගෝඨාභය රාජපක්ෂට රජයෙන් දරණ වියදම් සම්බන්ධයෙන් පසුගියදා සමාජ මාධ්‍ය ජාලවල සහ ප්‍රධාන ධාරාවේ මාධ්‍යවල ද කතාබහට ලක් වී තිබිණි.

ඒ පිළිබඳව මේ වසරේ ජනවාරි මස 24 දිනැතිව ජනාධිපති ලේකම් කාර්යාලයේ තොරතුරු නිලධාරීවරයා වෙත තොරතුරු දැනගැනීමේ අයදුම්පතක් යොමු කළ FactSeeker, ගෝඨාභය රාජපක්ෂ හිටපු ජනාධිපතිවරයා වෙනුවෙන් මසකට රජය දරණ වියදම කොපමණ ද? යන්න විමසා බැලුවෙමු.

ජනාධිපති කාර්යාලයේ තොරතුරු නිලධාරී, ජනාධිපති ජ්‍යෙෂ්ඨ සහකාර ලේකම් එස්කේ හේනාධීර ගේ අත්සනින් යුතුව එම අයදුම්පතට පිළිතුරු ලිපියක් ලැබී තිබුණේ 2023 අප්‍රේල් මස 11 දිනය.

හිටපු ජනාධිපති ගෝඨාභය රාජපක්ෂගේ දෙසැම්බර් මාසයට අදාළ වියදම් දක්වා තිබූ එම පිළිතුරු ලිපියට අනුව විශ්‍රාම වැටුප, ඉන්ධන දීමනාව සහ ලේකම් දීමනාව සඳහා රුපියල් 9,91,000 ක් ද දුරකතන, විදුලිය ජලය සහ අනෙකුත් වියදම් සඳහා රුපියල් 3,38,387.60 ක් ද වැය කර ඇත.

ගෝඨාභය රාජපක්ෂ මේ වන විට පරිහරණය කරන වාහනවල තොරතුරු ලබා දෙන මෙන් FactSeeker කළ ඉල්ලීමට ප්‍රතිචාර දක්වමින් ජනාධිපති ලේකම් කාර්යාලය පවසන්නේ, අදාළ තොරතුරු අදාළ අංශයෙන් ඉල්ලා තිබෙන අතර, එය ලැබුණු වහාම පිළිතුරු ලබා දෙන බවය.

විශ්‍රාමික ජනාධිපතිවරුන්ගේ අනෙකුත් පුනරාවර්තන වියදම් ඇතුළත් වන වියදම් වාර්තාව තුළ මෙම වියදම් එකම වැය විෂයක් යටතේ සටහන් වන බැවින් විශ්‍රාම වැටුප, ඉන්ධන දීමනාව, දුරකතන, විදුලිය, ජලය සහ වෙනත් දීමනා වෙන් වෙන් වශයෙන් ලබා දිය නොහැකි බව ද එම ලිපියේ සඳහන් කර තිබේ.