මෝදි අගමැතිගේ ආරක්ෂාව තහවුරු කිරීමට වීදි සුනඛයින් මැරුවාද?
ඉන්දීය අග්‍රාමාත්‍ය නරේන්ද්‍ර මෝදිගේ ශ්‍රී ලංකා සංචාරය වෙනුවෙන් විශේෂ ආරක්ෂිත වැඩපිළිවෙළක් අනුගමනය කිරීමට මෙරට රජය සැළසුම් කර ඇත.
by Anonymous |
අප්‍රේල් 4, 2025
මෙම ආරක්ෂිත වැඩපිළිවෙළට සමගාමීව කොළඹ නගරයේ වීදි සුනඛයන් ඉවත් කිරීමට ගත් තීරණයට එරෙහිව සත්ව හිංසනයට එරෙහි සංවිධාන එක්ව ඊයේ (03) කොළඹ ඉන්දීය මහ කොමසාරිස් කාර්යාලය ඉදිරිපිටදී උද්ඝෝෂණ ව්‍යාපාරයක් පවත්වා තිබිණි.
එම උද්ඝෝෂණයේ වීඩියෝවක් සමාජ මාධ්‍ය හරහා සංසරණය වන වීඩියෝවක් නිරීක්ෂණය වුණි. ඉන්දීය අගමැතිවරයාගේ මෙරට සංචාරය හේතුවෙන් වීදි සුනඛයින් ඉවත් කිරීමට රජය තීරණයක් ගෙන තිබේද? යන්න පිළිබඳව Factseeker විමසා බැලීය.
එම වීඩියෝව මෙතැනින් – https://youtu.be/wiELQrRjOLk
මෙම තීරණය පිළිබඳව ප්‍රධාන ධාරාවේ මාධ්‍ය වාර්තා කර තිබේද? යන්න සොයා බැලූ අතර එවැන්නක් හමු නොවුණි. නමුත් සත්තව හිංසනයට එරෙහි සංවිධාන එක්ව පැවැත්වූ උද්ඝෝෂණය ඔවුන් ද වාර්තා කර තිබිණි.
මෙම පළකිරීම් තුළ බොහෝ පරිශීලකයින් දක්වා තිබුණේ එය සමාජීය වශයෙන් යහපත් බවයි. එසේ වුවත් සුනඛයින් ඉවත් කිරීමේ ක්‍රියාවලියේදී මරා දැමීමට කටයුතු කරන්නේ නම් එය වැරදි ක්‍රියාවක් බවයි. එමෙන්ම මෙම උද්ඝෝෂණයේ නියලෙන්නන් වැඩිදුරටත් සඳහන් කරන්නේ නරේන්ද්‍ර මෝදි අග්‍රාමාත්‍යවරයා මෙරටට පැමිණීම හේතු කරගෙන වීදි සුනඛයින් ඉවත් කිරීමට ගත් තීරණය ඉතාම කුරිරු තීරණයක් සහ අනවශ්‍ය දෙයක් බවයි.
මේ සම්බන්ධයෙන් Factseeker සත්ව සුභසාධක සංසදයේ කාරක සභික ගිහාන් දිනුෂ්කගෙන් කළ විමසීමේදී ඔහු පැවැසුවේ, නිදහස් චතුරස්‍ර පරිශ්‍රයේ සුනඛයින් ඉවත් කරන ආකාරය ඇතුළත් වීඩියෝවක් නිරීක්ෂණය වීමෙන් පසු කොළඹ මහ නගර සභාවෙන් ඒ පිළිබඳ විමසීමක් කළ බවයි. සුනඛයින් අල්ලා ගෙන පැමිණි බව ඔවුන් එහිදී තහවුරු කළ බව ද හෙතෙම වැඩිදුරටත් පැවැසීය.
ඒ අනුව ඉන්දීය අග්‍රාමාත්‍යවරයා පැමිණෙන බැවින් වීදි සුනඛයින් ඉවත් කිරීමට රජය තීරණය කර තිබේ ද? යන්න පිළිබඳව FactSeeker කොළඹ මහ නගර සභාවෙන් විමසීය. එහිදී කොළඹ නාගරික කොමසාරිස් පාලිත නානායක්කාර සඳහන් කළේ, ඕනෑම රාජ්‍ය නායකයෙකු පැමිණෙන විට මෙම වීදි සුනඛයින් ඉවත්කිරීම කාලයක සිට කරන බවයි. එමෙන්ම එන්නත්කරණය නොකළ සුනඛයින්ගෙන් ජලභීතිකාව වැළඳීමට අවකාශ ඇති බැවින් එවැනි සුනඛයින් ඉවත් කිරීමට නීතිමය වශයෙන් හැකියාව ඇති බවත් ඔහු සඳහන් කර සිටියේය.
මේ සම්බන්ධයෙන් වැඩිදුරටත් අදහස් දැක්වූ කොමසාරිස්වරයා සඳහන් කළේ ඉන්දීය අග්‍රාමාත්‍යවරයා පිළිගැනීමේ උත්සවය නිදහස් චතුරශ්‍ර පරිශ්‍රයේ පැවැත්වීමට සැළසුම් කර තිබෙන නිසා ඒ අවට වීදි සුනඛයින් ඉවත්කිරීමට කටයුතු කර ඇති බව ද පැවැසීය.
ඒ අනුව FactSeeker කළ විමර්ෂණයෙන් පැහැදිළි වන්නේ, මෙලෙස වීදි සුනඛයින් ඉවත් කිරීමට රජය තීරණය කර ඇති බවට දැක්වෙන පුවත සත්‍ය බවයි. එමෙන්ම එය ඉන්දීය අග්‍රාමාත්‍යවරයාගේ පැමිණීම වෙනුවෙන් සිදුකරන බවත් මීට පෙර ද රාජ්‍ය තාන්ත්‍රිකයින් පැමිණීමේ අවස්ථාවලදී සහ ජනතාවගේ ආරක්ෂාව වෙනුවෙන් මෙය සිදුකර ඇති බවත් FactSeeker තහවුරු කරගනු ලැබීය.
