හයේෂිකා ප්‍රනාන්දු උපකාරක පන්ති දේශකවරිය ඇගේ පිළිම අලෙවි කර නෑ
"ටීචර් අම්මා පිළිම හදලා: එකක් 25,000 ගාණේ විකුණලා" යන ශීර්ෂය සහිතව පුවත්පතක මුල් පිටුවේ පළවූ පුවතක් ඇතුල් පිටු වාර්තාවක්ද සමග ඡායාරූපයක් සමාජ මාධ්‍ය ඔස්සේ විවිධ අර්ථකථන සමග හුවමාරු වන බව FactSeeker නිරීක්ෂණය කළේය.
by Anonymous |
මැයි 19, 2025
ටීචර් අම්මා යන අන්වර්ථ නාමයෙන් හඳුන්වන හයේෂිකා ප්‍රනාන්දු නමැති උපකාරක පන්ති දේශකවරිය සිය ප්‍රතිමා නිර්මාණය කර අලෙවි කරන බව මෙම පුවත මගින් වාර්තා කර තිබිණි.
එය ̒ලංකාදීප පුවත්පතේ පිටු සැලසුම අනුව සකස් කර තිබෙන බව නිරීක්ෂණය වූ අතර එම පුවතෙහි ඉකුත් 12 වන දින ඊයේ ලෙස සඳහන් කර තිබූ බැවින් අපි 2025-05-13 වන දින ලංකාදීප පුවත්පත පරීක්ෂා කළෙමු. එහි මුල් පිටුවේ හෝ ඇතුළු පිටුවක එවැනි පුවතක් දැකිය නොහැකි විය.
මේ සම්බන්ධයෙන් FactSeeker ලංකාදීප කර්තෘ මණ්ඩලයෙන් විමසූ අතර ඔවුන් තහවුරු කළේ, මෙවැනි පුවතක් එදින ලංකාදීප පුවත්පතේ ප්‍රාදේශීය මුද්‍රණයක පළ වූ බවයි. එම පුවත සඳහා පොලීසියේ උසස් නිලධාරියෙකු මූලාශ්‍ර කරගෙන ඇති බව ද ඔහු ප්‍රකාශ කළේය.
මෙම පුවතේ සඳහන් පරිදි හයේෂිකා ප්‍රනාන්දු සම්බන්ධයෙන් කළ විමර්ශනවලදී ඇය ප්‍රතිමා විකිණීමක් කළ බව වාර්තා වී නැතැයි පොලිස් මාධ්‍ය ප්‍රකාශක ජ්‍යේෂ්ඨ පොලිස් අධිකාරී බුද්ධික මනතුංග අප කළ විමසීමකදී සඳහන් කළේය.
FactSeeker මේ සම්බන්ධයෙන් හයේෂිකා ප්‍රනාන්දුගේ මාධ්‍ය ප්‍රකාශක ලෙස කටයුතු කරන අනිල් ප්‍රසංගගෙන් කළ විමසීමේදී ඔහු ප්‍රකාශ කළේ එය සම්පූර්ණයෙන් අසත්‍ය බවයි. මෙවැනි පිළිමයක් සම්බන්ධයෙන් ඔවුන් දැන ගත්තේ සමාජ මාධ්‍ය පෝස්ට්වලින් බව ද ඔහු වැඩිදුරටත් ප්‍රකාශ කළේ ය.
2025-04-19 දින හයේෂිකා ප්‍රනාන්දු සිය ෆේස්බුක් පිටුවේ පළ කර තිබූ වීඩියෝවක් FactSeeker සොයා ගත් අතර තමාගේ නමින් වන ප්‍රතිමා රුපියල් 25,000 බැගින් අලෙවි කරන බවට කරන ප්‍රචාර අසත්‍ය බව ඇය එහිදී ද සඳහන් කරන්නීය.
එම වීඩියෝව මෙතැනින්. (මිනිත්තු 40 තත්පර 43 සිට බලන්න.)
මේ අතර විවිධ ආගමික කරුණු සම්බන්ධයෙන් උපහාසාත්මක පෝස්ටු පළ කරන “සමරකෝන් පූජා භාණ්ඩ නිෂ්පාදකයෝ” නමැති “විනෝදාස්වාද වෙබ් අඩවියක් (Entertainment website)” ලෙස ස්වයං වර්ගීකරණය කර ගෙන ඇති ෆේස්බුක් පිටුවක් අපට නිරීක්ෂණය විය. එහි “හයේෂිකා ගුරුදෙවි පිළිම” රුපියල් 25 000 කට මිලදී ගත හැකි බව සඳහන් දැන්වීමක් පළ කර තිබෙන අයුරු නිරීක්ෂණය විය.
ලංකාදීප පුවත්පතේ ඉහත පුවත පළවීමෙන් පසුවද ඒ සම්බන්ධයෙන් තවත් උපහාසාත්මක පෝස්ටුවක් එම ෆේස්බුක් පිටුව මගින් පළ කර තිබිණි.
කෙසේ වෙතත් මෙම ෆේස්බුක් පිටුවට අදාළ සමරකෝන් පූජා භාණ්ඩ නිෂ්පාදකයෝ නමින් පවතින පිටුවෙහි පළ කර ඇති දුරකතන අංකයට ඇමතුව ද එහිදී ද පිළිගත හැකි තොරතුරක් හමු නොවුණි.
ඒ අනුව හයේෂිකා ප්‍රනාන්දු සිය පිළිම නිර්මාණය කර අලෙවි කරන බවට පළවන පුවත් සාවද්‍ය බව FactSeeker තහවුරු කරයි.
