එම වට්ස්ඇප් පණිවිඩ හා සමාජ මාධ්‍ය පෝස්ටු මගින් දැක්වුණේ, කාලගුණ විද්‍යා දෙපාර්තමේන්තුව අප්‍රේල් 29 සිට මැයි 12 දක්වා දැඩි උෂ්ණත්වයක් ඇති බවට අනතුරු අඟවමින්, 45°C සිට 55°C දක්වා උෂ්ණත්වයක් සහිත අධික තාපයක් පිළිබඳව අනතුරු අඟවා ඇති අතර, සෞඛ්‍ය අවදානම් වළක්වා ගැනීම සඳහා උදේ 10 සිට සවස 3 දක්වා ගෘහස්ථව රැඳී සිටින ලෙස ජනතාවට උපදෙස් දී තිබෙන බවයි.

සිවිල් ආරක්ෂක අධ්‍යක්ෂ ජනරාල්වරයා විසින් නිකුත් කරන ලද බවට සඳහන් කරමින් මාර්ගෝපදේශ පෙළක් ද ඒ සමග දක්වා තිබේ.

FactSeeker මේ සම්බන්ධයෙන් සිදු කළ කරුණු විමර්ශනයේදී මෙබඳු අවදානම් තත්ත්වයක් සම්බන්ධයෙන් මෙරට කාලගුණ විද්‍යා දෙපාර්තමේන්තුව නිවේදනයක් නිකුත් කර නොමැති බව නිරීක්ෂණය විය. 2025.04.29 දින නිකුත් කළ උණුසුම් කාලගුණය පිළිබඳ අවවාදාත්මක නිවේදනයෙන් ද එවැනි අනතුරුදායක තත්ත්වයක් සම්බන්ධයෙන් තොරතුරු සඳහන් නොවීය.

FactSeeker මේ පිළිබඳව කාලගුණ විද්‍යා දෙපාර්තමේන්තුවේ නියෝජ්‍ය අධ්‍යක්ෂ ප්‍රීතිකා ජයකොඩිගෙන් සිදු කළ විමසීමකදී ඇය සඳහන් කළේ අදාළ පෝස්ටුවල දැක්වෙන අන්දමේ අන්තරායක් මේ වන විට නොමැති බවත්, එවැනි අවවාදාත්මක නිවේදනයක් දෙපාර්තමේන්තුව නිකුත් කර නොමැති බවත්ය.

කාලගුණ විද්‍යා දෙපාර්තමේන්තුව ඒ සම්බන්ධයෙන් නිකුත් කළ මාධ්‍ය නිවේදනය පහතින්.

එමගින් දැක්වෙන්නේ සමාජ මාධ්‍ය හා අනෙකුත් විද්‍යුත් මාධ්‍යය හරහා මේ දිනවල සංසරණය වන දිවයිනේ ඉදිරි කාලගුණ තත්ත්වය පිළිබඳ අසත්‍ය ප්‍රචාරවලට නොරැවටෙන ලෙස ජනතාවගෙන් ඉල්ලා සිටින බවයි.

දිවයින සහ ඒ අවට කාලගුණය සම්බන්ධව කාලගුණ විද්‍යා දෙපාර්තමේන්තුව පැය 24 පුරා අවධානයෙන් සිටින අතර ඉදිරි කාලගුණික තත්ත්ව පිළිබඳව කාලගුණ විද්‍යා දෙපාර්තමේන්තුව මගින් නිකුත් කරනු ලබන නිල අනාවැකි සහ පූර්ව අනතුරු ඇවීම් පිළිබඳව පමණක් නිරන්තර අවධානයෙන් කටයුතු කරන ලෙස එම නිවේදනය මගින් ජනතාවගෙන් කාරුණිකව ඉල්ලා සිටියි.

කාලගුණය සම්බන්ධ යවත්කාලීන තොරතුරු සහ ඉදිරි කාලගුණය පිළිබඳ නිල නිවේදන කාලගුණ විද්‍යා දෙපාර්තමේන්තුවේ නිල වෙබ් අඩවියෙන් සහ ෆේස්බුක් පිටුවෙන් ලබාගත හැකිය.

මේ පිළිබඳව FactSeeker තවදුරටත් සිදු කළ සොයාබැලීමේදී මෙම පණිවිඩයම වෙනත් දින වකවානු සහිතව ඉන්දියාවේද හුවමාරු වී ඇති බව අනාවරණය විය. ඉන්දීය කාලගුණ විද්‍යාඥයින් විසින්ද මේ පෝස්ටුවේ ඇතුළත් කරුණු ප්‍රතික්ෂේප කර තිබුණි.

ඒ අනුව, උණුසුම් කාලගුණික තත්ත්වයක් පිළිබඳ අධි අවදානම් නිවේදනයක් බව දක්වමින් සමාජ මාධ්‍ය ඔස්සේ හුවමාරු වන පෝස්ටු හා පණිවිඩ අසත්‍ය බව FactSeeker සනාථ කරයි.